“Оростой дайтахгүйн тулд НАТО-ийн зүүн жигүүрийн орнууд дайнд бэлтгэх хэрэгтэй” гэж Польшийн Үндэсний аюулгүй байдлын товчооны тэргүүн Яцек Сивиера өнгөрсөн оны сүүлээр хэлж байв. Дараа нь Шведийн Иргэний батлан хамгаалахын сайд Карл-Оскар Болин, Цэргийн ерөнхий командлагч генерал Микаэль Байден нар “Шведэд дайн болж магадгүй” гэж хэлсэн.
Орос, Украины дайнаас улбаалаад Европын бусад орон ч бас дайнд татагдан орох вий гэсэн болгоомжлол бий. Тэгвэл дайнд бэлтгэх хэрэгтэй гэж ил тод анхааруулсан дараагийн улс нь Норвеги, Польш, Румын болов.
Норвегийн Батлан хамгаалахын сайд Бьорн Арилд Грам дайнд бэлтгэлтэй байж, үндэсний батлан хамгаалахын төсвөө нэмэгдүүлэхийг уриалав. Украин дахь дайн шувтарсан ч гэсэн Оросын талаас болзошгүй түрэмгийлэл байгаа гэдгийг тэр сануулжээ. Орос дахь ардчилал устаж, дайныг эсэргүүцэж зүрхэлсэн цөөн хэдэн хүн нь шорон эсвэл байлдааны талбар луу яваад дуусч буйг мөн онцоллоо.
“Финланд, Швед улсууд НАТО-д гишүүнээр элссэний хариуд ОХУ төлөвлөгөөгөө эргэн харж, хүчээ хаана байрлуулахаа шийдэх магадлалтай” гэж Бьорн Арилд Грам хэлэв.
Түүнчлэн Польшийн Батлан хамгаалахын сайд Владислав Косниак-Камыш Украин дахь дайны бусад болзошгүй хувилбарыг үгүйсгэхгүй гэж мэдэгдээд, холбоотнуудыг бэлтгэлтэй байхыг уриалжээ. Ингэхдээ Украин ялагдаж, ОХУ НАТО-ийн зүүн жигүүрт түрэмгийллээ тэлж болзошгүй гэх хамгийн муу хувилбарыг дэвшүүлсэн байна.
“Бүх л хувилбар боломжтой. Би хамгийн муу хувилбарыг энд авч үзэж байна. Энэ бол одоогийн нөхцөлд байдалд Батлан хамгаалахын сайдын үүрэг шүү дээ. Бид бүх зүйлд бэлтгэлтэй байх ёстой. Тийм ч учраас бид нөхцөл байдлыг хянаж, дүгнэлт хийж, зэвсэг, сумны хомсдолоо нөхөж байна.
Румыны Батлан хамгаалахын дэд дарга, генерал Георгица Влад ч бас Оросын түрэмгийлэл тархаж болзошгүй тул бэлтгэлтэй байх ёстой гэж үзэж байгаагаа мэдэгдэв. Харин Румыны Ерөнхий сайд Марсель Чиолаку энэ мэдэгдэлтэй санал нийлэхгүй байгаагаа илэрхийлжээ.
Эх сурвалж: UKRAYINSKA PRAVDA, THE NEW VOICE OF UKRAINE
