Засгийн газрын хуралдаанаар сайд Ж.Сүхбаатарт өгсөн үүрэг даалгаврын дагуу Зам, тээврийн удирдлагын ухаалаг системийг бүрдүүлэгч цахим гэрчилгээ олгох ажлыг 2022 оны дөрөвдүгээр улиралд багтаан зохион байгуулах ёстой байсан. Түүгээр зогсохгүй, 2023 оны нэгдүгээр сараас дагаж мөрдүүлэх ёстой байсан. Энэ ажил ямар явцтай байгаа талаар бид мэдээлэл бэлтгэлээ.
Учир нь, цахим гэрчилгээнд хамрагдаагүй автотээврийн хэрэгслийг энэ оны гуравдугаар сарын 1-нээс авто замын хөдөлгөөнд оролцуулахгүй байх зохицуулалт үйлчилж эхлэх ёстой байсан. Бэлтгэл ажилтай холбоотойгоор үйлчилж эхлэх хугацаа нэг сараар сунасан байна.
Одоогоор 450 байршил, 160 уулзварт уншигч төхөөрөмж байршуулжээ. Дөрөвдүгээр сарын 01-нээс бүрэн ашиглаж эхэлснээр торгуультай, зөрчилтэй машин хөдөлгөөнд оролцох боломжгүй болж, жолооч ачаалалтай уулзвар, замыг ашиглавал илүү төлбөр төлөх болж байна.
Тэгвэл ирэх долоо хоногийн даваа гарагт Улаанбаатар хотын авто замын түгжрэлийг бууруулах үндэсний хорооноос нэгдсэн байдлаар иргэдэд мэдээлэл өгөхөөр төлөвлөжээ. Бид тухайн мэдээллийг уншигч, үзэгч танд шууд дамжуулан хүргэх болно.
