Засгийн газрын өчигдөр болсон ээлжит хуралдаанаар Гашуунсухайт-Ганцмод боомтын төмөр замын хил холболтын гэрээ болон тухайн үед гэрээ байгуулахад хоёр талын харилцан санал солилцсон протокол, хэлэлцээ зэрэг баримт бичгийг олон нийтэд ил тод болгох шийдвэр гарсан.
Уг шийдвэрийн дагуу өчигдөр оройгоос “Эрдэнэс Тавантолгой” ХК-ийн сайтад нүүрсний гэрээнүүдийг ил болгон байршуулж эхэлсэн юм. Үүнтэй зэрэгцээд маргааш өглөө Ерөнхий сайд Г.Занданшатарыг огцруулах эсэх асуудлыг УИХ-аар хэлэлцэх гэж байна.
Мөн энэхүү цаг үед УИХ-ын дарга Д.Амарбаясгалан “Эрдэнэс Тавантолгой” ХК-ийн нүүрсний гэрээтэй холбоотой өөрийн байр сууриа цахим хуудсаараа дамжуулан илэрхийлжээ.
Тэрбээр “Уг нь улс төрийн намын даргын өрсөлдөөнд бид хоёр өрсөлдсөн юм. Аль ч ардчилсан улсад намын даргын төлөөх өрсөлдөөн байдаг энгийн л зүйл.
Харамсалтай нь, эхлээд хүний амь насанд хүрсэн гэж гүтгэсэн, няцаагдсан. Бортээг эзэмшдэг гэсэн, нэг ч хүрз нүүрс гараагүй нь нотлогдсон.
Одоо бүр оффтейк гэрээ болоод явчихлаа. Ер нь Бодь группийн оффтейк гэрээг хаацайлах гэж л нүүрсний сонсгол дээр Бортээг гэдэг зохиомол сэдэв гаргаж, сэдвийг сэдвээр дарах ажил хийгдсэн. Энэ нь улам бүр тодорхой болж байна.
Нүүрсний оффтейк гэрээнүүд Үндэсний аюулгүй байдлын зөвлөлөөр орж, шууд гэрээ хийгдэхэд Улсын Их Хурлын дарга асан Г.Занданшатар та 2019, 2020 онуудад зөвлөмж гаргасан аюулгүйн зөвлөлийн гурван гишүүний нэг нь байсан төдийгүй Бодь группийн оффтейк гэрээний хүрээнд төмөр замыг өргөн царигаар тавих ажлыг 2018 онд Засгийн газрын Хэрэг эрхлэх газрын даргын хувьд Та өөрөө хариуцаж байсан шүү. Тэр үед би нам дээрээ л байж байсан.
Гэхдээ энэ маш сайн зүйл. Үнэнд их ойртож байна. Одоо дахиад нэг л алхчих, олон нийт ч энэ сэдэв дээр анхаарлаа битгий сулруулаарай.
Олон нийтэд явуургүй гүтгэлэг тараахаа одоо зогсоо. Маргааш Төрийн байгуулалтын байнгын хороон дээр нүүр нүүрээ харж байгаад баримттай, нээлттэй ярилцаж, олон нийтийн эргэлзээнд цэг тавья” хэмээн бичжээ.
Discussion about this post