Амаржсан эхэд хатуу хандсан эрүүл мэндийн байгууллагын удирдлагуудад хариуцлага тооцох уу? гэдэг асуудал өндөрөө аваад байна. Өөрөөр хэлбэл Өргөө амаржих газарт өчигдөр төрсөн эхийг орой нь ХӨСҮТ рүү шилжүүлэхдээ гэрийн шаахай, халаадтай нь машинд суулгасан асуудалтай холбоотойгоор өнгөрсөн шөнө Эрүүл мэндийн яамнаас шуурхай хурал зарлажээ.
Уг хурлаар Эрүүл мэндийн сайд Т.Мөнхсайхан харьяаллын дагуу Нийслэлийн Засаг дарга Д.Сумъяабазараас Нэгдүгээр амаржих газрын дарга Г.Баясгалан, НЭМГ-ын дарга Л.Төмөрбаатар нарыг ажлаас чөлөөлөх хариуцлага тооцохыг хүсэж, албан тоот илгээсэн мэдээлэл байна. Улсын онцгой комисс боломжоороо ажиллаж байгааг бид бүхэн харж байна. Гэвч энэ мэт хүний эрх зөрчигдсөн ноцтой асуудал нийгэмд бухимдал үүсгээд багагүй хүмүүс цуглан жагсаал цуглаан дээрээ тулаад байна. Өмнө нь хөдөөнөөс хүнд өвчтэй хүн эмчилгээ хийлгэхээр нийслэл хотод ирсэн боловч PCR шинжилгээ өгөөгүй гэсэн шалтгаанаар тээврийн товчоогоор нэвтрүүлэхгүй байсаар эмнэлгийн тусламж авч чадалгүй амиа алдсан харамсалтай үйл явдал болсон. Угтаа эрдэнэт хүний амь үрэгдээд байхад холбогдох албан тушаалтан шууд хариуцлага хүлээн огцрох ёстой атал НЭМГ-н дарга Төмөрбаатар өдийг болтол ажлаа хийсээр алдаа гаргасаар байна. Нэг үхрийн эвэр доргиход мянган үхрийн эвэр доргидгын үлгэрээр хариуцсан ажилдаа хайнга хандсан энэ мэт алдаанаас Монгол улсын засгийн газрын нэр хүнд унах хор уршигтай тул ерөнхий сайд энэ удаад дорвитой алхам хийж холбогдох хүмүүсийг ажлаас нь чөлөөлөх байх гэж иргэд харж байна.
