Монгол Улсын Засгийн газраас өнгөрсөн тавдугаар сард БНСУ-ын иргэдийг манай улсад 90 хоног визгүй зорчих шийдвэрийг гаргасан. Мөн Байгаль орчин аялал жуулчлалын яамнаас 2023-2024 оныг “Монголд зочлох жил” болгон зарлаж, нэг сая жуулчин хүлээн авах зорилт тавьсан. Ингэснээр манай улс аялал жуулчлалын чиглэлээр орлого олох нөхцөл тодорхой хэмжээнд бүрдэж байгаа юм. Тиймээс бид жуулчдыг Монголд татахын тулд бидэнд хөгжүүлж, бэхжүүлэх ёстой давуу тал юу байна, эсрэгээрээ засаж сайжруулах, арилгах ёстой сул юу байгааг харуулах iSee.mn сайт “Эргээд ирээрэй” цуврал контентын хүрээнд саяхан манай улсад ирж аялж буй бичлэг нь Монголчуудад хэдийнээ танил болсон блогер Чаекожэтэй ярилцлаа.
-Сайн байна уу? Та Монголын үзэгч, уншигчдадаа өөрийгөө танилцуулахгүй юу? -Сайн байна уу? Намайг Чаекожэ гэдэг. Би БНСУ-ын Korean Jay гэдэг youtuber байна.
-Таны блогыг үздэг. Очсон улс орноо их гэгээлгээр харж, тайлбарлаж явдаг санагдсан. Одоо хэдэн орноор аялсан байна вэ. Аялаад хэр удаж байна? -Нийт 35 орноор аялсан байна. Үүргэвчтэй аялал хийгээд удаж байгаа. Харин блог хийж эхлээд гурван жил болсон. Би аялах маш дуртай учраас өөртөө хадгалж үлдээхийн тулд блог хийж эхэлсэн ч бас мөнгө олох боломжтой юм байна гэж бодоод youtube-дээ бичлэгээ хийдэг болсон.
-Одоо таны youtube хуудсанд Монголоор аялсан аялал нь гарч байгаа шүү дээ. Таны хувьд хэзээ Монголд ирсэн бэ. Анх удаа ирсэн үү. -Зургаадугаар сар /2022.06/-д Монгол руу очсон. Тийм ээ. Анх удаа очсон. Нийт гурван долоо хоног аялсан.
-Ер нь яагаад Монгол руу аялъя гэж бодсон бэ. Юу хамгийн их нөлөөлөв? -Монголд очсон шалтгаан гэвэл тэр үед Монгол визгүй болчихсон байсан учраас очиход маш хялбар байсан. Өмнө нь зөндөө л Монголд очъё гэж боддог байсан л даа. Харин сүүлийн үед онгон дагшин байгалийг мэдэрмээр санагдаад ямар ч эргэлзээгүй Монголыг зорьсон юм.
-Блогыг тань үзэхэд манай орныг их магтаж, сайшаасан байсан. Таны төсөөлж байсан шиг байж чадсан уу. Сэтгэлд нь хэр нийцсэн бэ? -Блог хийж байгаа үүднээс магтсан зүйл огт биш шүү. Монгол үнэхээр надад маш их таалагдсан. Надад сайхан санагдсан учраас л өөрийн блог дээрээ өөрөөрөө байж хэлсэн зүйл. Миний төсөөлснөөс ч илүү байсан. Миний аялахдаа баримталдаг зарчим гэхээсээ илүүтэй зүгээр л тухайн улс орны соёлыг байгаагаар нь хүлээж авдаг. Тэрнээс л таашаал авдаг гэх үү дээ.
-МОНГОЛЫН ЗАЛУУС НАЙРСАГ ЭЕЛДЭГ БАЙСАН БОЛ ЭСРЭГЭЭРЭЭ НАСТАЙ ХҮМҮҮС ТААЛАМЖГҮЙ ХАРЬЦАЖ БАЙСАН-
-Ганцаараа аялсан харагдсан. Хэр их хүндрэл бэрхшээл тулгарав? -Аялал жуулчлалын компаниар дамжуулж очиход мэдээж гадаад хэлний мэдлэгтэй хүмүүс тосож аваад тайлбарлаад хөтөч хийгээд явдаг бол ганцаараа үүргэвчээ үүрээд аялдаг хүмүүст тийм зүйл байхгүй нь нэг онцлог. Аялаад явж байхад мэдэхгүй зүйл их учраас асуух зүйл их гарна. Гудамж талбайд англи тэмдэглэгээ байвал гэж их бодсон. Гэхдээ Монголчууд Солонгос хэл үнэхээр сайн мэддэг юм билээ. Солонгос хэлтэй хүнтэй их таарсан. Маш эелдэг найрсаг сайн хүмүүс. Залуу хүмүүс их найрсаг байсан бол эсрэгээрээ жаахан настай хүмүүс надаас зайгаа бариад тааламжгүй зан гаргаж байсан.
-Хөндлөнгийн нүдээр хараад юу хамгийн их өөрчлөгдөөсэй гэж хүссэн бэ? -Монголд сайхан байсан болохоор сөрөг талыг хэлж мэдэхгүй байна. Гэхдээ Монгол дүү нартай ярилцахад Монголын юмнууд үнэтэй гэж байсан. Залуу хүмүүс амьдрахад жаахан хүндрэлтэй гэх юм уу даа. Тэр талаас ярихад нь энгийн нэг аялагч хүний үүднээс биш тэдний ах гэдэг хүний зүгээс харахад Төр засаг нь таатай амьдрах нөхцөлийг бүрдүүлж өгөөсэй гэж бодсон.
-Яг одоо таны санаанд бууж байгаа хамгийн дурсамжтай зүйлээс хуваалцаач. Монголд байхад хамгийн хөгжилтэй дурсамж болж үлдсэн зүйл юу байв? -Рашаан орчхоод сумын төв рүү мотоциклоор явж байхад байгаль нь үнэхээр Швейцар орон шиг үзэсгэлэнтэй байсан учраас сэтгэлд хамгийн их хоногшсон. Үе үе автобус зэргээс харвал Солонгосын 1990 онд байгаа юм шиг тийм дүр төрхтэй байсан болохоор дурсамжаар аялж байгаа юм шиг санагдсан.
-Галт тэргэнд болсон үйл явдал ч бас хөгжилтэй санагдаж байх шиг байсан. Тэр тухайд? -Галт тэргэнд болсон үйл явдал зүгээрээ их хөгжилтэй санагдсан. Галт тэрэгний нойлын хувьд ч гэсэн. /инээв/
-БУУДЛЫНХАА МӨНГИЙГ ТӨЛЧХӨӨД БАЙХАД ДАХИЖ МӨНГӨ НЭХЭЭД ТӨЛСӨН. ХҮМҮҮСИЙГ ОЧООРОЙ ГЭЖ УРИАЛМААРГҮЙ БАЙНА-
-Улаанбаатарт байх хугацаандаа хаана байрлаж байв. Асуудал тулгарсан уу? -Улаанбаатарт байх хугацаанд Golden Gobi нийтийн байранд байрласан. Тэнд байхад жаахан асуудал гарсан учраас блогын үеэр хүмүүст танилцуулъя гэж огт хүсээгүй. Надад тааламжгүй байсан учраас аялагчдыг очоорой гэж нээх их уриалмааргүй байна. Би буудлынхаа мөнгийг төлчхөөд байхад нөгөө талаас өгөөгүй гээд бага зэрэг маргаан гарсан. Тэгээд сүүлдээ би дахиад хүмүүсийн нэхсэн мөнгийг өгчхөөд гарч ирсэн.
-Аль аль аймгаар аялав? -Улаанбаатар тэгээд Орхон аймаг руу галт тэргээр яваад дараа нь Элсэн тасархай руу автобусаар аялсан.
-Монголд байх хугацаанд хэр их зардал гаргасан байна вэ. Бусад орнуудтай харьцуулбал зардал хэр байна? -Аяллын зардал нэг сая вон арай хүрээгүй. Монгол болохоор Тайвань, Филиппин, Индонезийг бодвол өртөг өндөр санагдсан. Харин Европ, Америкийг бодвол хямдхан санагдсан. Солонгосыг бодвол бас хямдхан санагдсан. Гэхдээ Солонгосоос тийм аймар хямдхан байгаагүй л дээ.
-Дараа дахиж Монголд ирэх үү. -Тийм ээ. Очмоор байна. Монгол маш том өргөн сайхан нутагтай учраас цагт баригдаад үзэж чадаагүй зүйлс их байгаа. Монголын өвлийг үзмээр байна. Хөвсгөлөөр аялмаар байна.
-Таны youtube хуудсанд Монголын талаар хүмүүс ямар сэтгэгдэлтэй байх шиг байна вэ? -Монгол их сайхан юм аа. Очихыг хүсэж байна гэсэн хүмүүс их байсан.
-Дараа таныг ирэхэд юу хамгийн их өөрчлөгдсөн байгаасай гэж хүсэж байна вэ? -Монголд заавал ч үгүй аяллын компаниар дамжуулахгүйгээр ганцаараа үүргэвчтэй аяллаар ирж байгаа хүмүүсийн аялах нөхцөлийг бүрдүүлж өгвөл их жуулчид ирэх байх. Жишээлбэл, нийтийн тээврээ англи гадаад тэмдэглэгээтэй болгох эсвэл гадаад хэлээр буудлаа зарлах гэдэг ч юм уу. Тиймэрхүү бололцоог бүрдүүлээсэй гэмээр байна. -Ярилцсанд баярлалаа.
Эх сурвалж: isee.mn
