ОРОСЫН ХЭВЛЭЛД: С.Лавров Монголын эрх баригчдад Донбасст явуулж буй тусгай ажиллагааны явцыг танилцуулав
ОХУ-ын Гадаад хэргийн сайд Сергей Лавров өнөөдөр/2022.07.05/ манай улсад албан ёсны айлчлал хийж байна.
Орос-Украины нөхцөл байдлын улмаас дэлхийн улс төрийн уур амьсгал тун эмзэг байгаа энэ үед Оросын сайд манай улсад айлчилсныг бусад улс орон хэрхэн дүгнэж буй нь ихээхэн анхаарал татаж байгаа юм. Тэгвэл Оросын “Первый канал” суваг “С.Лавров Монголын Гадаад хэргийн сайдад Донбасст явуулж буй тусгай ажиллагааны явцын талаар танилцуулав” хэмээх мэдээ нийтэлжээ.
Нийтлэлд“Барууныхан Украины эргэн тойронд болж буй үйл явдлыг бодитойгоор мэдээлдэг хэвлэл мэдээллийн хэрэгслийн үйл ажиллагаанд саад учруулахын тулд бүхнийг хийж байна. Энэ тухай манай Гадаад харилцааны сайд Сергей Лавров Монголд айлчлах үеэрээ онцолжээ. Сайд хэдхэн цагийн өмнө Улаанбаатар хотод очсон бөгөөд мэргэжил нэгттэйгээ(ГХ-ны сайд Б.Батцэцэг) уулзсан байна. Гадаад харилцааны сайдууд хоёр талын болон олон улсын тавцанд өрнөж буй цаг үеийн асуудлаар ярилцлаа. Лавров дэлхий дахинд хурцадмал байдал урьд өмнө нь байгаагүй түвшинд хүрээд буйг онцолжээ.
Мөн Сергей Лавров Донбасст энгийн иргэдийг хамгаалах манай тусгай ажиллагааны явцын талаар Монголын эрх баригчдад дэлгэрэнгүй мэдээлэл өгсөн байна” гэжээ.
Мэдээллийг эх сурвалжаас ЭНД дарж үзнэ үү.
Эх сурвалж: Первыи канал
Ерөнхий сайд Эгийн голын усан цахилгаан станц барих төслийг ОХУ-тай хамтран хэрэгжүүлэх хүсэлтэй байгаагаа С.Лавровт илэрхийлэв
Монгол Улсын Ерөнхий сайд Л.Оюун-Эрдэнэд ОХУ-ын Гадаад хэргийн сайд С.В.Лавров өнөөдөр бараалхлаа.
Уулзалтын эхэнд Ерөнхий сайд Л.Оюун-Эрдэнэ Монгол Улс, Оросын Холбооны Улсын хооронд дипломат харилцаа тогтоосны 100 жилийн ойг өнгөрсөн жил тэмдэглэн өнгөрүүлснийг дурдаж, харилцааны шинэ зууныг сайн хөршийн найрсаг харилцаа, иж бүрэн стратегийн түншлэлийн үзэл санааны дагуу бодит агуулгаар баяжуулах нь манай хоёр улсын ашиг сонирхолд нийцнэ хэмээн тэмдэглэв.
Цар тахлын дараах эдийн засгаа сэргээх зорилгоор Засгийн газраас санаачлан хэрэгжүүлж буй “Шинэ сэргэлтийн бодлого”-ын талаар Ерөнхий сайд Л.Оюун-Эрдэнэ ОХУ-ын Гадаад хэргийн сайдтай санал солилцож, цаашид худалдаа, эдийн засгийн хамтын ажиллагааг эрчимжүүлэх шинэ боломжууд, тухайлбал, гурван улсын хоорондын онцгой томоохон төслүүд, нэн түрүүнд байгалийн хий дамжуулах хоолой, Бичигт-Чойбалсан-Эрээнцав, Арцсуурь-Шивээхүрэнгийн зүүн болон баруун босоо тэнхлэгийн төмөр замын бүтээн байгуулалт, Алтанбулаг-Замын-Үүдийн хурдны зам, “Алтанбулаг” эдийн засгийн чөлөөт бүс болон хилийн боомтуудыг хөгжүүлэх дэд бүтцийг сайжруулах зэрэг төслүүдийг онцлон ярилаа.
Ерөнхий сайд Л.Оюун-Эрдэнэ ОХУ-аас манай улсад нийлүүлж буй газрын тосны бүтээгдэхүүний найдвартай нийлүүлэлтийн асуудлыг онцолж, эрчим хүчний салбар дахь хамтын ажиллагааг өргөжүүлэх, үүний тулд манай улсын нутаг дэвсгэрт Эгийн голын усан цахилгаан станц барих төслийг ОХУ-ын компаниудтай хамтран хэрэгжүүлэх хүсэлтэй байгаагаа илэрхийлэв.
