Эмийн санд орж ирсэн үйлчлүүлэгчдээ сэтгэл гарган зөвлөдөг залуугийн тухай мэдээ өчигдөр оройноос хойш нийгмийн сүлжээгээр хөврөв. “Гадаад хэлийг гаргуун эзэмшсэн нь бахархмаар юм. Хүн мэргэжилдээ эзэн байх ийм л байхан даа” гэх зэргээр хамаг л сайхан үгсийг олон нийт түүнд л зориулж байлаа. Түүнтэй цаг товлон яарсаар, 13 дугаар хороолол, “Натур” худалдааны төв орчимд байх эмийн санд нь очиход сошиал сүлжээнээс зургийг нь харсан нөгөө л эелдэг залуу даруухан инээмсэглэсээр биднийг угтлаа. Өдгөө 25 настай тэрбээр 2018 онд их сургуулиа төгсчээ.
ӨВӨӨГИЙНХӨӨ МЭРГЭЖЛИЙГ ӨВЛӨСӨН ЭМ ЗҮЙЧ -Р.Бишрэлт айлын дунд хүү. Гавьяат эмч өвөөгийнхөө захиасыг биелүүлж, удам залгасан цагаан нөмрөгтөн болжээ. Түүний өвөө нь Монгол Улсын гавьяат эмч, уушгины хэмээн алдаршсан Ж.Бадрал агсан. Тэрбээр 2018 онд ажлын гараанд ирэхэд шантарч мэгдэхийн зовлон олон байсан ч мөрөөдөлдөө хөтлөгдсөөр өдийг хүрчээ.
Залуухан эм зүйч Англи, Герман хэлээр чөлөөтэй ярьдаг. Харин Орос хэлийг сүүлд бага зэрэг эзэмшсэн дээ гэх нь түүний даруу зан гэлтэй. “Манай эмийн сангаар Орос, Англи хэлтэй хүмүүс зөндөө л орж ирдэг. Өчигдөр хоёр гадаад хүн нэгэн зэрэг орж ирсэн нь хүмүүст сонирхолтой санагдсан байх. Ажлаа тарж очоод, хүмүүсийн сэтгэгдлийг уншаад зөндөө их урам авлаа” хэмээн яриагаа цааш нь үргэлжлүүлэв.
ААВ ЭЭЖЭЭС ӨВЛӨСӨН ҮНЭТ ХӨРӨНГӨ МИНЬ ХҮМҮҮЖИЛ -Даруухан эм зүйчийн амнаас байн байн л хүмүүжил гэх үг цухалзах нь үнэхээр бахархмаар. “Аав ээжээсээ өвлөсөн хамгийн үнэтэй хөрөнгө минь хүмүүжил, зөв хандлага” гэж тэрбээр ярив. Р.Бишрэлт угийн тусч сэтгэлтэй, хэнд ч гар сунгадаг, ажилдаа нягт нямбай тул энэ орчмынхон нь түүнийг андахгүй болжээ. Ямар ч үед үйлчлүүлэгчдээ эмнийх нь үйлчилгээ, хэрэглэх зааврыг нь тайлбарлаж өгдөг. Дахин дахин асууж нягталдаг гээд орж ирсэн хүн бүр түүнийг хүндэлнэ.
Харин эм зүйч Р.Бишрэлт “Энэ бол миний л ажил. Бид алдаа гаргах эрхгүй. Нэг ч гэсэн хүн эмээ зөв уудаг байгаасай гэж би боддог. Энэ бол миний нийгэмдээ оруулж байгаа хувь нэмэр, хариуцлага” хэмээн ярив. Мөн “Хүмүүс эмийг зажилж уугаад байдаг нь буруу. Зажлах эм тусдаа байдаг шүү дээ. Наад зах нь үүнийг нь байнга хэлж өгөх чухал” хэмээв.
ХҮН БҮР ХОЁР ХЭЛ СУРААСАЙ -Гадаад хүн ороод ирэхэд чөлөөтэй ярилцаж, эмийг нь тайлбарлаад өгчихдөг Р.Бишрэлт “Хэл бол цаг үеийн шаардлага, хэрэглээ” хэмээн тодорхойлж байна. Тэрбээр “ Хүмүүс наад зах нь хоёр хэлтэй болоосой гэж би боддог. Хүн хэл сурахын тулд өөртөө хана босголгүйгээр, өдөр бүр хэвшил болгох хэрэгтэй. Тэгж чадвал ямар ч гадаад хэлийг сурч чадна гэж хариулсан.
НЭГ Ч ГЭСЭН МОНГОЛ ЗАЛУУ ЭХ ОРНЫХОО ХӨГЖИЛД ХУВЬ НЭМЭР БОЛООСОЙ -Сагс тоглож, усанд сэлэх дуртай гэж ярих, эм зүйч Р.Бишрэлт нэг ч гэсэн Монгол залуу мэдлэг чадвараа эх орныхоо хөгжилд зориулаасай гэж хүсэж явдгаа ярилаа. Түүний хувьд ч нэг ч гэсэн Монгол хүн эрүүл байгаасай хэмээн хичээж, бусдад тусалсандаа урамшин урагшилдаг, өнөөгийн нийгмийн сор болсон залуусын нэг.
Тэр Монгол залуусыг эх орондоо хайртай, эрүүл зөв хандлагатай байхыг уриалж байна. Тэр, тэд эх орныхоо ирээдүйг гэгээлгээр харж байна.
МЭДЭЭЛЛИЙН ЭХ СУРВАЛЖ: urug.mn
