УИХ-ын гишүүн Ц.Мөнхцэцэг охидод ариун цэврийн хэрэгслийг үнэгүй олгохоор хуульчлах хэрэгтэй талаар твиттер хуудсандаа жиргэсэн байна.
Тэрбээр “Ариун цэврийн хэрэгсэл авах боломжгүйгээс олон охид хичээл сургуульдаа явахгүйд хүрч байгаа нь хүний эрхийн зөрчил гэж үзэж Шинэ Зеланд, Шотланд, ӨАБНУ зэрэг дэлхийн 21 улс, бүс нутагт охидод ариун цэврийн хэрэгслийг үнэ төлбөргүй олгохоор хуульчилсан байдаг. Манай улсад бас ингэх нь зөв.
Үүний тулд бид улс орнуудын жишгээр ариун цэврийн хэрэгслийг татвараас чөлөөлөх, үнийг буулгах арга хэмжээнээс эхлэн шат дараалалтай бодлого явуулъя. Эхний ээлжид сургууль, дотуур байранд ариун цэврийн үнэгүй хэрэгсэл байрлуулах төсвийг батлах хэрэгтэй. Та бүхэн маань дэмжээрэй” гэжээ.
-ОХИДЫГ ХАЙРЛАЖ АРИУН ЦЭВРИЙН ХЭРЭГЛЭЛ ҮНЭГҮЙ ТАРААДАГ ДЭЛХИЙН ЖИШИГ-
Шотланд ариун цэврийн хэрэглэлийг үнэгүй болгосон хууль баталсан анхны улс. 2020 онд батлагдсан энэ хуулиар ариун цэврийн хэрэглэлийг эмийн сан, сургууль болон залуучуудын клубт үнэгүй болгожээ.
Их Британид ариун цэврийн хэрэглэлд ногдох татварын хэмжээ таван хувь байдаг ба шотландчуудын хувьд ариун цэврийн хэрэглэлд сар бүр ойролцоогоор 12 евро зарцуулдаг аж. Хэдэн жилийн өмнө Их Британийн Засгийн газрын хийсэн судалгаагаар, эмэгтэйчүүдийн 40 хувь нь гэр ахуйн хүрээнд ариун цэврийн хэрэглэлийг гар аргаар хийхээс өөр аргагүйд хүрдэг гэсэн тоо гарч байжээ.
Ариун цэврийн хэрэглэлтэй холбоотой асуудал боловсролын салбарт тулгамдсан асуудал болж байгаа нь онцгой анхаарал татаж байгаа юм. Учир нь, орлого багатай өрхийн охид сургуульдаа явахгүй хичээлээ таслах тохиолдол элбэг байдаг аж. Тиймээс, 2019 онд Их Британи даяар боловсролын байгууллагуудад охидын эрүүл ахуй, эрүүл мэндийг хамгаалах, мөн хичээл завсардах асуудлыг шийдэхийн тулд ариун цэврийн хэрэглэлийг үнэ төлбөргүй олгож эхлэх шийдвэр гаргасан байна. Мөн Шинэ Зеланд ариун цэврийн хэрэглэлийг үнэгүй олгох шийдвэр гаргасан байдаг.
-МОНГОЛД ХАРИН…-
Харин Монголд УИХ-ын гишүүн Ц.Мөнхцэцэг твиттер хуудаснаа “Ариун цэврийн хэрэгсэл авах боломжгүйгээс олон охид хичээл сургуульдаа явахгүйд хүрч байгаа нь хүний эрхийн зөрчил гэж үзэж Шинэ Зеланд, Шотланд, ӨАБНУ зэрэг дэлхийн 21 улс, бүс нутагт охидод ариун цэврийн хэрэгслийг үнэ төлбөргүй олгохоор хуульчилсан байдаг. Монголд Улсад ч бас ингэх нь зөв” хэмээн байр сууриа илэрхийлээд байна.
Ч.Ундрам гишүүн ч мөн “Сар бүр үүнээс болж хичээлдээ явж чаддаггүй, хоцрогдолд орж байгаа охид Монголд олон бий гэсэн олон улсын байгууллагын судалгаа байдаг. Энэ асуудлыг шийдвэрлэхийн төлөө явна аа” хэмээсэн байна.
Тэднийг шүүмжлэн доромжлогчид эхнээсээ гарч эхлэв. Гэхдээ ихэнх нь эрэгтэйчүүд. “Асар жижигхэн, инээдтэй асуудалд анхаарал хандуулж байна, эцэг эхчүүдийн хариуцлагын асуудал, нэртэйгээр нь бэлгэвч тараая” гэж хэмээн шагширцгааж байна.
Харин эсрэгээрээ эмэгтэй гишүүд овоо шүү гэмээр байна. Манайдаа л охидын төлөө анхлан ингэж дуугарагчид болж байна. Хүний эрхийн мэдрэмж гэдэг чинь энэ. Яагаад гэж үү. “Дотуур байрны охин хөвөнтэй хөнжлөө цуулаад хэрэглэсэн чинь дотуур байрны багш гарыг нь хугартал зодсон” харамсалтай тохиолдол хүртэл гарч байсан. Энэ мэт эмгэнэлтэй кейс олон. Хөдөө ариун цэврийн хэрэгсэл авах мөнгөгүйгээс хичээлээ тасалдаг охид ч олон. Та бидний соёлт ертөнц гээд байгаа хот хүрээнд бус. Ялангуяа хөдөө гэдгийг энд тодотгоё. Тиймээс охидыг, тэдний сэтгэл зүйг ойлгодоггүй, дэмждэггүй юм аа гэхэд ядаж шүүмжилж шүлсээ үсэргэхгүй байцгаая.
У.УЯН
