Газрын тосны ханш дэлхийн зах зээл дээр баррель тутамд 75 ам.доллар орчим байсан бол өнгөрсөн долоо хоногт 65.4 ам.доллар болж буурсан байна. Тэгвэл үүнийг дагаад манай улсад бензиний үнэ буурах эсэхийг АМГТГ-ын Орлогч дарга Ц.Эрдэнэбаяраас тодрууллаа.
-Дэлхийн зах зээл дээр газрын тосны үнэ буурч байгаа юм байна. Үүнийг дагаад манай улсад бензиний үнэ буурах уу?
-Дэлхийн зах зээл дээр Брент маркын газрын тосны үнэ баррель тутамд 75 ам.доллар хүрч өслөө. Сүүлийн долоо хоног бага зэргээр буурч 65 ам.доллар орчим болсон. Наймдугаар сарын 25-30-ны хооронд ОХУ-ын “Роснефть” компаниас тухайн сарын дундаж үнээр бодож хилийн үнийг тогтооно. Тэгэхээр наймдугаар сарын 25-аас хойш үнэ тогтоно гэсэн үг. Бензиний үнэ буурах эсэх дээр эргэлзээтэй байна.
Харин үнэ өсөхгүй гэж таамаглаж байгаа. Хэдийгээр сүүлийн долоон хоногт дэлхийн зах зээл дээр газрын тосны үнэ буурсан ч тухайн сарын дундаж ямар байхаас шалтгаалж бензиний үнэ тогтох юм.
-Тэгэхээр бензиний үнэ буурах эсвэл тогтвортой байх эсэх нь наймдугаар сарын 25-аас хойш шийдэгдэх юм байна?
-Тийм ээ. Сарын дундаж үнийг тооцож байж шийдддэг. Дэлхийн зах зээл дээр сүүлийн долоо хоног газрын тосны үнэ буурсан ч манайд дагаад буурна гэж хэлэхгүй. Яагаад гэвэл 10 орчим ам.доллараар бууж байгаа нь огцом бууралт биш. Газрын тосны үнэ 6-7 ам.долларт хэлбэлзэх нь хэвийн үзэгдэл. Өнгөрсөн сард болсон “OPEC+”-ийн орнуудын хуралдаанаар өдрийн олборлолтын хэмжээг 400 мянган баррелиар нэмэгдүүлсэн.
Энэ нь түүхий тосны үнийг дэлхийн зах зээл дээр 100 ам.доллар хүртэл өсгөхгүйн тулд авч хэрэгжүүлж буй арга хэмжээ. Дэлхийн эдийн засаг эргэн тэлж буй учир ийм арга хэмжээ авч хэрэгжүүлж байгаа гэсэн үг. Үүнээс харахад газрын тосны ханш он дуустал баррель тутамд 70 орчим ам.доллар байна гэсэн таамаг бий. Ханш ийм байвал цаашид бензиний үнэ өсөхгүй. Гэхдээ энэ бол таамаг гэдгийг бодолцож үзэх нь зүйтэй.
-Цар тахлын улмаас жилийн өмнө газрын тосны ханш огцом унаж, баррель тутамд 19 орчим ам.доллар болж байсан шүү дээ. Хэрвээ дельта хувилбар нийтэд тархсан тохиолдол газрын тосны ханш буурах боломжтой юу?
-Өнгөрсөн жил Засгийн газар аль болох үнэ тогтвортой байлгахын тулд ажилласан. 2020 оны нэгдүгээр сард АИ92 бензиний үнэ 1820 төгрөг байсан бол дөрөвдүгээр сард 1320 болтлоо 500 төгрөгөөр буурсан. Ингээд дунджаар 1450 төгрөгөөр худалдаалагдаж байлаа. Харин энэ он гарснаас хойш эрэлт нэмэгдэж, үнэ өссөн. Өмнө нь эдийн засаг хумигдаж, дэлхий даяар үйлдвэр, ажлын байр зогссоноос болж түүхий тосны үнэ огцом унасан. Энэ үед нийлүүлэлт нэмэгдэж, далайн боомтууд дээр түүхий тос тээвэрлэсэн усан онгоцны түгжрэл үүссэн. Ингээд худалдан авалт буурсан учир газрын тосны үнэ огцом буурсан юм.
Харин одоо бол бүх зүйл эргэн хэвэндээ орж, эрэлт нэмэгдэж байна. Тэгэхээр он дуустал газрын тосны ханш 70 орчим ам.долларт хэлбэлзэнэ гэж таамаглаж байна. Гадаад зах зээлийн үнэ өссөн ч гэсэн Монгол Улсын Засгийн газар ААН-үүдтэй зөвшилцөн үнэ барих бодлого хэрэгжүүлж, вакцинжуулалт 60 хувьд хүртэл АИ92 шатахууныг 1450 төгрөгөнд хадгалсан. Дельта хувилбар эсвэл өөр ямар нэгэн хувилбарын давлагаа үүсэхэд Засгийн газраас арга хэмжээ авна.
-Ямар арга хэмжээ байх вэ? -Судалгааны түвшинд байгаа. Одоо үүнийг хэлэх эрт. Судлаад, төлөвлөсний дараа олон нийтэд танилцуулна.-Засгийн газраас дахин үнэ барих бодлого хэрэгжүүлнэ гэсэн үг үү? -Шууд тэгж ойлгож болохгүй. Олон төрлийн арга хэмжээ авч хэрэгжүүлэх боломжтой. Сая гэхэд л АИ92 бензиний улсын нөөцийг 30 мянган тоннд хүргэх Засгийн газрын тогтоол гарсан.
Үүнийг татан авахад шат дараалсан арга хэмжээг хэрэгжүүлнэ. Тэрнээс биш шууд үнэ рүү нь чиглэж ажиллавал хэцүү шүү дээ. ААН-үүд бизнесийн зарчмаар ажиллаж байгаа. Үүнд төр оролцож, үнэ өсгөх, өсгөхгүйг зааж өгнө гэж байхгүй. Тиймээс бид нөөцөө сайн бүрдүүлэх хэрэгтэй. -Одоогийн байдлаар нөөц хэр байгаа вэ? -Улсын хэмжээнд нөөц хэвийн байна. Газрын тосны бүтээгдэхүүн 30-аас доошгүй хоногийн нөөцтэй байх ёстой. АИ92 бензиний нөөц 2700 тонн байгаа. Үүн дээр нэмээд Засгийн газрын тогтоолоор 30 мянган тонныг нэмж нөөцөлнө.
Эх сурвалж: itoim.mn
