Яагаад жүдо гэж…?! Монголчууд олимпод жүдогоос л медаль найддаг, түүнийг нь ч манай жүдочид хөсөрдүүлэхгүй боллоо. Олимп болгоноос жүдо л гарцаагүй медаль авдаг болов. Жүдогийн ертөнцөд Монголчууд хамгийн том тооцогдох хүчин зүйл! Монголтой таарвал ямар ч тамирчин зүрх нь ү.х.н.э, итгэл нь алдарна, өөрийгөө чангалж зоригоо нэмж сэтгэлзүйгээ бэлдэх хэрэгтэй болно.
Дэлхий ертөнцийн асуудлыг ИХ 7 хэлэлцдэг бол жүдогийн ертөнцөд Монгол “ИХ 7”-д багтана. Монголын улстөр, эдийн засаг, нийгэм нь бүхэлдээ с.ө.н.ө.ж дуусаж байхад Монголын жүдо яагаад ийм болов?!
Жүдо бол өөр ертөнц. Тэнд өөр хууль, өөр зарчим, өөр дүрэм үйлчилдэг. Хэнд таалагдсан, хэнд таалагдаагүйгээс үл хамааран хуулийг бүгд чандлан мөрдөнө. Удирдлагын чанд хатуу эрэмбэтэй, ах зах, удирдагчаа мэддэг, нэгэн гарт зангидагдаж удирдагддаг. Удирдлага хэнд таалагдах, хэнд таалагдахгүй байх нь хамаагүй. Нэг командаар эхэлж нэг командаар дуусгана. Удирдлагаа, өрсөлдөгчөө, нэг нэгнээ хүндэтгэн, ёс журмыг чанд баримтлан харьцана. Жүдогийн 5 дүрэмийг хүргье. Нэгт: Худлаа хэлэхгүй Х.у.л.г.а.й хийхгүй.
Хоёрт: Багшаа болон ахмад үеэ хүндэлнэ. Гуравт: Өрсөлдөгчөө болсон багийн хамт олноо хүндэлнэ.
Дөрөвт: Сайн хүн сайн тамирчин болохын төлөө бүх хүч чадлаа дайчилна. Тавд: Жүдогийн ёс жаягийг чандлан биелүүлнэ.
Энэ таван дүрмийг жүдочин хүн бүр хар багаасаа цээжлэн давтдаг төдийгүй чандлан баримталж мөрддөг хууль нь! Хууль учраас өрсөлдөгчөө хүндлээгүй, илт ялсан мөртлөө нулиман доромжилсон Мароккогийн бөхөд ялалт өгөлгүй харин нэмж торгоод, өрсөлдөгчид нь шууд ялалт өгч байгаа юм. Мороккогийн дасгалжуулагч шүүгчтэй 100 хувь санал нэг байсан бөгөөд тэр бөх жүдогийн ертөнцөд ямар ч ирээдүйгүй болж байгаа юм.
Алтан медаль авсан Японы бөхөөс “Алтан медаль авчихаад та яагаад баярлахгүй байгаа юм бэ?” гэж асуухад “Миний өрсөлдөгч ялагдсан байхад би юундаа баярлах вэ” гэж хариулж байгаа нь жүдогийн ёсзүйн дагуу хариулж байгаа хэрэг. Энэ ёс суртахуун хувь хүний ёс суртахуун болж төлөвшдөг. Ийм нэгдмэл ёс суртахуун, зан заншил, бүгд хэлбэрэлтгүй мөрддөг нэгдмэл хууль дүрэм, хариуцлагатай ертөнц нь жүдогийн амжилтыг суурь нь юм. Ердөө л ийм.
Жүдогоор хичээллэж байгаа хүн бүр олимпоос медаль авч чадахгүй байх, дэлхийн аваргаас медаль авч чадахгүй байх, тэр байтугай тамирчин болж чадахгүй нь ч бий. Гэвч тэд хүн болж төлөвшиж чадна. Тиймээс би хүүгээ Монголын Жүдо Академид жүдогоор хичээллүүлдэг. Бэрх тамирчин болохгүй, гэхдээ хүн шиг хүн болно. Тэсвэр тэвчээр, амьдралын алив бэрхшээлийг ажралгүй давах хатуужил, хүнийг хайрлаж хүндлэх ухаан сууна, цуцалтгүй тууштай байдалд суралцана.
Жүдог зөвхөн дэмжих биш ажигла, судал, түүний философид нэвтэр, бас суралц! Ингэвэл та бидний алдаа, Монголын нийгмийн завхралын шалтгаан ч бас тод харагдана!
Эх сурвалж: Uyanga Gantumur
