Монгол Улсын Ерөнхийлөгчийн сонгуульд нэр дэвшигчид үнэмлэхээ гардан авснаар сонгуулийн сурталчилгаа өнөөдрөөс албан ёсоор эхэлж байна.
Нэр дэвшигчид Сонгуулийн ерөнхий хорооноос үнэмлэхээ гардан авсны дараа товч мэдээлэл хийсэн юм.
МАН-ын дарга У.Хүрэлсүхийн хувьд Тусгаар тогтнолын ордонд сонгуулийн сурталчилгааны нээлтээ хийлээ. Түүний сурталчилгааны нээлтэд гэр бүлийнхнээс гадна УИХ-ын дарга Г.Занданшатар, Ерөнхий сайд Л.Оюун-Эрдэнэ, парламентын гишүүдийн төлөөлөл, намын гишүүд дэмжигчид оролцсон юм.
Ийнхүү сонгуулийн сурталчилгаагаа албан ёсоор нээсэн У.Хүрэлсүх төв талбайгаас Сүхбаатар аймгийг зорилоо.
Дашрамд хэлэхэд тэрээр энэ сонгуулиар нэгэн хэвийн костюм, зангиатай хэвшмэл зургуудыг халж шинэлэг зураг постерууд гаргаж буй нь залууст нэлээдгүй таалагдаж эхлээд буй бололтой.
У.Хүрэлсүх: Би Ерөнхийлөгчөөр сонгогдвол ард түмнийхээ эв нэгдлийг нүдний цөцгий мэт сахин хамгаална
Монгол Улсын Ерөнхийлөгчийн 2021 оны сонгуульд МАН-аас нэр дэвшигч У.Хүрэлсүх нэр дэвшигчийн үнэмлэхээ гардлаа.
Үнэмлэхээ гардан авсны дараа У.Хүрэлсүх сонгуулийн мөрийн хөтөлбөрийн онцлох заалтуудыг танилцууллаа. Тэрбээр “Монгол Улсын Ерөнхийлөгчийн найм дахь удаагийн сонгууль өнөөдрөөс албан ёсоор эхэлж байна. Надад асар их хариуцлага үүрүүлж, Ерөнхийлөгчийн сонгуульд нэр дэвших боломжийг олгосон журмын нөхөд болон та бүхэнд чинь сэтгэлээсээ талархаж байна. Энэ бол маш хариуцлагатай сонгууль. Сонгуульд нэр дэвшигч нартаа амжилт хүсье. Ерөнхийлөгчийн сонгуулийг олон улсад маш анхааралтай ажиглаж байна. Тийм учраас энэ удаагийн сонгуулийг ил тод, нээлттэй, шударга өрсөлдөөнөөр явуулъя гэж уриалмаар байна. Цар тахлын үед сонгуулийн зардлыг хэмнэж аль болохоор хямд зардлаар энэ удаагийн сонгууль зохион байгуулахыг уриалж байна.
Монгол Улсын Ерөнхийлөгч гэдэг бол ард түмний эв нэгдлийн илэрхийлэл, Зэвсэгт хүчний ерөнхий командлагч, Үндэсний аюулгүй байдлын тэргүүн. Энэ бол маш хариуцлагатай алба. Хэрвээ би Ерөнхийлөгчөөр сонгогдвол дараах зүйлүүдэд анхаарал хандуулж ажиллана. Нэгдүгээрт, нийгэмд шударга ёсыг бэхжүүлэхэд ихээхэн анхаарна. Хууль бус, шударга бус тогтолцоог таслан зогсооход анхаарал тавьж ажиллана. Шүүх, прокурор зэрэг хууль хяналтын байгууллагын шинэчлэхэд тусгайлан анхаарна. Хүн биш хууль засагладаг төртэй болох ёстой гэж үзэж байна.
Хоёрдугаарт, хүний эрх, эрх чөлөө, ардчилсан тогтолцоог, эрх зүйт төрөө бэхжүүлэхэд ихээхэн анхаарч ажиллана. Хүний эрх эрх чөлөөг хадгалах парламентын тогтолцоог улам бэхжүүлэхийн төлөө анхааран ажиллана. Монгол Улс бол нэгдмэл нэг улс. Ардын намын Ардчилсан намын Монгол Улс гэж байхгүй. Ерөнхийлөгчөөр сонгогдвол ард түмнийхээ эв нэдлийг нүдний цөцгий мэт сахин хамгаална. Ард түмний эв нэгдлийг сахин хамгаалах нь Ерөнхийлөгчийн тэргүүн эгнээний үйл хэрэг.
Гуравдугаарт, Монголын иргэн болгон байгалийн баялгаас ижил тэгш хүртэж байх ёстой. Тийм учраас байгалийн баялгийн үндэсний санг байгуулж, улс орныхоо бүтээн байгуулалтыг хийж, иргэддээ баялгийг тэгш хуваарилна. Дараа нь гадаад бодлого. НҮБ болон бусад олон улсын тавцанд Монгол Улсын нэр хүндийг бэхжүүлэхийн төлөө хичээн ажиллана.
Дөрөвдүгээрт, Хүчирхэг Монгол Улсыг байгуулахын тулд Засгийн газар, УИХ-тай хамтран ажиллана. Цар тахлыг даван туулахын тулд Ерөнхийлөгчийн хувьд Засгийн газар, УИХ-тай хамтран ажиллана” гэдгийг хэллээ.
