Допингийн эсрэг үндэсний төв гуравдугаар сарын 17, 19-нд шөвгөрсөн 14 бөхөөс допингийн шинжилгээ авсан. Улмаар тэдгээр 14 бөхийн хоёроос нь допинг илэрсэн талаар өнөөдөр албан ёсоор зарласан билээ.
Албан бус эх сурвалжаас тодруулахад, Архангайн хоёр бөх болох улсын гарьд М.Бадарч, аймгийн арслан Д.Ням-Очир нараас допинг илэрсэн гэсэн. Цахим орчинд ч мөн Архангай аймгийн Цэнхэр сумын харьяат дээрх хоёр бөхөөс допинг илэрсэн гэх мэдээлэл цацагдаад буй.
Бид мэдээллийг тэнцвэртэй хүргэхийн тулд улсын гарьд М.Бадарчаас зарим зүйлийг тодрууллаа.
-Хоёр бөхөөс допинг илэрч, буруугаа хүлээн, уучлалт гуйсан гэж МҮБХ-ноос мэдээллээ. Дээрх хоёр бөхийн нэг нь таныг гэх мэдээлэл байна. Үнэн үү?
-Харин тийм мэдээлэл цахим орчинд гарсан байна лээ. Харсан, харсан. Надаас допинг илрээгүй. Худлаа мэдээлэл. Би допингийн шинжилгээ үргэлж өгдөг. Явцын шинжилгээ өгөхөөс татгалзаж байгаагүй. Тухай бүрд хариу нь сөрөг гарсаар ирсэн.
Допингийн шинжилгээний хариу гарах болгонд надаас илэрсэн гэх ташаа мэдээлэл цацагддаг. Энэ удаа ч бас тэгж байна. Ийм худал, ташаа мэдээлэл хэн цацаад байдаг юм бол. Гайхаж байна.
-Допингийн эсрэг үндэсний төвөөс танд шинжилгээнийх нь хариуг танилцуулсан уу?
-Танилцуулаагүй. Одоогоор надад утсаар мэдэгдээгүй байна. Допинг илэрсэн хоёр бөх буруугаа хүлээн, уучлалт гуйсан гэж МҮБХ-ноос мэдээлсэн байна лээ. Аймгийн цолтой хоёр бөхөөс допинг илэрсэн сураг дуулдсан. Нэр нь удахгүй тодорхой болох байх.
-Танай аймгийн бөх, аймгийн арслан Д.Ням-Очироос допинг илэрсэн гэх мэдээлэл байна. Үнэн үү. Та түүнтэй холбоо барьсан уу?
-Энэ талаар би мэдэхгүй. Аяндаа хэн, хэнээс допинг илэрсэн нь удахгүй тодорхой болох байх.
Эх сурвалж: eguur.mn
