Хөшөө бариулж чадахгүй байж хөршийн арга олно гэж юу байхав дээ.
За одоо энэ хүүхдээ яадаг юм байгаа юм? Буруу эрхэлсэн хүүхэд буурлуудынхаа мөнгөөр шоудаад цайны сүүгүй суулгаж байдаг даа.
Яг л тийм юм болоод байна. Энэ мэтийн бацаануудын рейтингийг тогтмол барих гэж пиарчид нь сар бүр ямар нэгэн дайсан сүртэй гэгч бодож олно, тэгээд түүнтэйгээ тэмцэлдүүлнэ. Тэмцэгч энэ тэр гэсэн нэр сүр дагалдуулна. Сүртэй зурагтай сүржин мэдэгдлүүд үйлдвэрлэнэ. Тэгээд улс орны амьдрал өөдөлдөг бол хамаа алга. Тэмцэгч, Волтрон, Пороро, Супермэн гээд ямар ч нэр өгч, яаж ч рекламдсан яахав зүгээр. Ганц хөшөө гайгүй бариулчихаж чадахгүй, бантахдаа нураагаад ачуулж байгаа хүн хоёр хөршийн аргыг олоод хойд урдаас бараа таслахгүй залгуулна гэж юу байхав дээ.
Дээр нь хамгийн ойрын хоёр хөрштэйгээ Монгол Улсыг төлөөлөн мөр тэнцүү, тэргүүн чацуу ярилцаж чадах хүнийг Ерөнхий сайдаар сонгож баймаар юм байна. Путин, Си Зин Пин хоёр голох нь аргагүй, гол гаргахаас өөрцгүй л дээ. Тоож дуугарахгүй том загнахаа ч мэдэхийн сайнаар мэдэж байгаа. Амьдралын үнэнтэй аргагүй нүүр тулна гэдэг чинь энэ шүү дээ. Хүнд бас чадал хүрэхгүй юм гэж яах аргагүй байдаг юм.
Чадал хүрэхгүй ажилд нь чангааж хүлээд байна гэхээр эрх баригч МАН энэ хүүхдээ нэг талаар эвгүй хүчирхийлээд байгаа хэрэг юм л даа. Өө тэгээд хаанаас ч хамаагүй үндэсний дайсан гээч юмыг үтэр түргэн ургуулна. Оюун-Эрдэнийн хувьд энэ үг бүүр эх утгаа алдсан. Андлалын хөшөөг эсэргүүцсэн хүн үндэсний дайсан, цалин нэмүүлэхийг шаардсан эмч сувилагчид бас л үндэсний дайсны үгээр хөдөлсөн болж хувирсан. Одоо чадахгүй байгаа ажлыг нь чадал заагаад хэлээд шүүмжилсэн бүх хүн нөгөө л үндэсний дайсан.
Урвагчдын сүүлчийн орогнох байр нь үндэсний үзэл гэдэг үгийг утгаар нь урагшлуулж яваа хүн дээ. Ганц хөшөө юу ч биш, ажлын цагаа хуваарилж чаддаг юм уу, энэ хүн чинь? Шатахуун импортлогчдыг Орос руу өглөөхөн мордуулчихаад, Дарханы замд тоос шороондоо тортойж явах зуур нь эргүүлээд уулзалтанд дуудчихаж байгаа юм.
Өнөө хэд нь буцаад наашаа, бухимдлаа үүрч, толгойгоо сэгсэрсээр, 11:00 цагт амжиж ирэх гээд аргаа барж явна. За одоо энэ бухын хүзүүнээс хатуу, бусдын шашны пастор хүнээ яадаг юм байгаа юм? МАН энэ залуугаа чөлөөлж, төрөө эзэнтэй, түмнээ галтай болгоно уу.
Эмүжин
