Японы сүмо бөхийн холбооноос өнөөдөр ирэх сарын 12-нд эхлэх Намрын тэмцээний банцүкэг зарлалаа. Өнгөрсөн тэмцээний дараа мэргэжлийн сүмогийн 73 дахь ёкозүна болсон Тэрүнофүжи баруун жигүүрийг манлайлан барилдана. Шинэ аварга өнөөдөр сэтгүүлчидтэй онлайнаар ярилцлаа.
-Өнөөдөр Намрын тэмцээний банцүкэ гарлаа. Сэтгэгдэл ямар байна?
-Башё эхлэх ойртлоо шүү гэж бодсон.
-Сэтгэл санаанд ямар нэг өөрчлөлт гарав уу?
-Онцгой өөрчлөлт байхгүй. Үргэлж хэлж ярьж байсан шигээ, урьд өмнөхөөсөө илүү хариуцлагаа ухамсарлаж явах хэрэгтэй боллоо. Тэмцээн эхэлтэл чадах бүх зүйлээ хийж, бүрэн бэлтгэлтэй башёд орох бодолтой байна.
-Өдий хүртэл туулж ирсэн замаа эргэн харахад?
-Хамаг хүчээрээ хичээн зүтгэж ирсэн хөдөлмөрийг минь Бурхан харж, үнэлжээ гэж бодож байна.
-Юу танд тус дэм болов?
-Маш олон хүн тусалж, дэмжиж байсны ачаар энд ирж чадлаа. Ояката, окамисан, дэмжигчид, гэрбүл гээд бүгд надад барилдах, хичээх нөхцөл байдлыг бүрдүүлж өгсөн.
-Ояката багш тань ёкозүна болсны дараа ямар нэг зөвлөгөө өгсөн үү?
-Маш их үүрэг, хариуцлага ирсэн шүү. Юманд хөнгөн хийсвэр хандаж болохгүй гэж хэлсэн.
-Озэки цолноос юу нь өөр байна?
-Хамгийн том цол шүү дээ. Би янз бүрийн зүйл хийж чадах хүн биш тул чаддаг ганц зүйлээ л хамаг чадлаараа хийж ирсэн. Үүний ач тус гарсан.
-Өнгөрсөн тэмцээний талаар?
-Хамгийн сүүлийн өдрийн барилдаанд чаддаг мэддэг бүх зүйлээ гаргаж барилдана гэж шийдсэн байлаа. Өрсөлдөгч хэн ч байсан хамаагүй.
-Хакүхо аваргын талаар?
-Сүмо бөхөд орох замыг минь нээж өгсөн ах. Түүнийг ялж, ижилхэн ёкозүна цол хүртэж, ачийг нь хариулах юмсан гэж боддог байсан. Зорилго болсон аварга цолоо авсан болохоор цаашдаа сүмогийн ертөнцийн төлөө хичээн зүтгэх болно.
-Ямар Ёкозүна болох хүсэлтэй байна?
-Дохён дээр ч, дохёноос буугаад ч хүн болгонд хүндлэгдсэн, хайрлагдсан ёкозүна болохыг хүсч байна. Ёкозүна цолтой анхны башёдоо сайн бэлтгэж барилдах болно.
-Ёкозүна болчихлоо гэж хэзээ анх бодитоор мэдэрсэн бэ?
-Анх удаа цүна олс зүүсэн өдөр.
-Хувийн амьдралдаа юунд анхаарах вэ?
-Ганц би ч биш бүгд нэг л дэлхийд амьдарч байгаа болохоор бүгд үүрэг хариуцлагаа ухамсарлаж яваасай.
-Өнөөдөр банцүкэгээ хараад төрсөн сэтгэгдэл?
-Цүна олс анх зүүгээд аварга боллоо гэж мэдэрч байсан болохоор өнөөдөр банцүкэд гайхаж, сэтгэл хөдлөх зүйл байсангүй.
