18 жилийн шоронд мэндэлсэн америк охин өөрийн мөрөөдлөө биелүүлж дэлхийн хамгийн шилдэг их сургуулиудын нэг болох Харвардад тэнцэж чадсан байна.
Ээж нь жирэмсэн байхдаа ял сонссон тул Скай Кастнер шоронд мэндэлсэн юм. Түүнийг аав нь ганцаараа өсгөсөн бөгөөд Скай багаасаа л аливаа зүйл сонирхолтой сайн сурагч байжээ.
Тэрбээр Техас мужийн Конрогийн ахлах сургуулийг төгсөхдөө дүнгээрээ гуравдугаарт жагссан аж. Бага сургуульдаа Скай зөвлөгч хүнтэй холбож өгдөг хөтөлбөрт хамрагдаж Мона Хэмби нэртэй эмэгтэйтэй танилцаж дотноссон нь түүнд том тус болсон байна.
Скай Монагийн талаар ярихдаа “Монагийн надад зааж зөвлөж өгсөн бүх зүйл маш их үнэ цэнтэй байсан” гэсэн юм.
2022 оны гуравдугаар сард Мона өөрийн нөхөр Рэндитэй хамт Скайг Харвардын их сургуулийн кампус руу дагуулж явжээ. Тэрхүү явдлын дараа Скай Харвардад орох зорилго тавьж үүнийхээ төлөө шаргуу зүтгэн мөрөөдлөө биелүүлж чадсан байна.
Эх сурвалж: Unilad
