Баян-Өлгий аймгийн Өлгий сумын Ах хуст тау багийн хоёрдугаар гудамжинд иргэн Д.Мөнгөнтуяа нэгдүгээр 18-ны өдрийн 21:40 цагийн орчимд гэрээсээ гараад сураггүй болсон тухай бид мэдээлсэн билээ.
Тус охиныг хайх эрлийн ажиллагаа хэрхэж байгаа, сураг гарсан эсэх талаар ээжээс нь утсаар холбогдож тодруулахад “одоо хүртэл сураг чимээ гараагүй, олдоогүй хэвээр хайж байна” гэсэн хариултыг өглөө.
Тухайн өдөр гэрээсээ гарахдаа “Цэвэр рашаан авна” гээд ээж, ах хоёрынхоо зөвшөөрлөөр гарчээ.
Улмаар ээж нь хэвлэлд өгсөн ярилцлагадаа “Манай охин гэрээсээ гараад “хоёр найзтайгаа уулзаж байна, жаахан байж байгаад орно” гэж ярьсан. Гэвч тухрайн өдөр ирээгүй. Харин маргааш өглөө нь үүрээр уулзсан гэх хоёр найз нь гэрт орж ирээд “Мөнгөнтуяаг Одмаа гээд эгч нь аваад явсан” гэж хэлсэн. Гэвч ах нь хоёр найзтай нь цуг Одмаа гэх эмэгтэй гэрт очсон ч байгаагүй. Тухайн эмэгтэй Мөнгөнтуяатай уулзаагүй гэж хэлсэн юм билээ. Гэвч дараа нь чат нь олдож н.Одмаа гэх эмэгтэй “энд сууж байна хүрээд ир” гэж зураг явуулаад дуудсан байсан. Дараа нь Одмаа хэлэхдээ “Би Мөнгөнтуяатай уулзсан. Уулзаад Цэнгэл сумын цагдаа болон багийн засаг дарга найзаараа хүргүүлсэн гэсэн” хэмээн ярьсан байгаа юм.
Тэгэхээр олон нийтийн цахим сүлжээнд Д.Мөнгөнтуяатай уулзсан хуурай эгч н.Одмаа гэгч нь эмэгтэй энэ хэрэгт холбоотой хэмээн сэрдэгдээд байв.
Тэгвэл Баян-Өлгий аймгийн цагдаагийн байгууллага энэ хэрэгт холбогдуулан: н.Одмаа болон түүний найзууд гэх Цэнгэл сумын цагдаа, багийн засаг дарга нарыг шалгаж, мэдүүлэг авсан байна. Улмаар тэд охинтой уулзаад аймгийн төвд байрлах “Сансар” хүүхдийн дэлгүүрийн үүдэнд буулгаад явсан нь тогтоогдсон байна. Иймд тэднийг эл хэрэгт холбогдолгүй хэмээн үзэж буй бололтой.
Учир нь тэд охиныг дэлгүүрийн гадаа орхиод явснаас 5-6 минутын дараа өөр машин ирж аваад явж буй дүрс бичлэг үлдсэн байна. Тухайн машины мэдээлэл, ул мөр олдоогүй нөхцөл байдалтай байгаа аж.
