Арабын нэгдсэн Эмират улсын Дубай хотноо болсон дуудлага худалдаа дэлхийн шинэ дээд амжилт тогтоосон тухай Gulf News сонин мэдээллээ. Тодруулбал, тавдугаар сарын 1-нд зохион байгуулсан буяны дуудлага худалдааны үеэр автомашины АА9 дугаар $10,35 сая доллараар арилжаалагджээ.
“Буяны энэ арга хэмжээнд оролцох боломжийг бидэнд олгосон шейх Мохаммедад (АНЭ-ийн Ерөнхий сайд ба Дубайн захирагч) би талархаж байна” хэмээн АА9 дугаарын эзэн, нэрээ нууцалсан эрхэм хэллээ. Энэ өдөр мөн U31, T38, E51 дугааруудыг борлуулж арилжаа нь нийтдээ $13,2 сая долларын ашиг авчирсан ажээ. Дээрх мөнгийг ядууст хоол хүнс тараах кампанид зориулах юм.
Үнэ хаялцагсдын дунд АНЭ-ийн Ерөнхий сайд ба Дубайн захирагч Мохаммед бен Рашид Аль Мактум ч багтаж байлаа. Автомашины дугаар арилжих өмнөх дээд амжилтыг 2016 онд тогтоосон ба тэр үед D5 дугаар 9 сая доллараар зарагдсан байв.
Дөрөвдүгээр сарын 12-нд эхэлсэн Рамадан сарын өмнө Дубай хот нийтдээ 100 сая порц хоолыг ядууст тараана гэж амласан юм. Үүний мөнгийг буяны зарим байгууллагууд янз бүрийн арга хэлбэрээр бүрдүүлж байна.
