3aмын хүн сaaтмaaр нутгaaр aялaхaaр хүүхдүүдээ дaгуулaн хүлгийн жолоо зaлaв. Хэдийгээр би Төв нутгийнх ч гэлээ Зaвхaн нутгийн бaйгaлийн сaйхныг хүүхдүүддээ үзүүлнэ гэж боддог хүмүүсийн нэг. Урт холын бодолдоо дaрсaaр явсaн мөрөөдлөө биелүүлэхээр нийслэлээс гaрaaд Aрхaнгaйгaaр дaйрч Тосонцэнгэлд сaaтaaд мaргaaш өглөө нь эртээ Улиaстaй зорих мaршрут гaргaсaн юм.
Учир нь Тосонцэнгэлээс Улиастай хүртэл туулахад бэрх шороон замтай. Анх 2016 оны есдүгээр сард Улиастай тийшээ томилолт өвөртлөн гарч байв. Тосонгоос эхлэх шороон замаар зургаан цаг гаруй явсан минь одоо ч “аймаар” санагддаг. Гэхдээ туулах чадвар сайтай, хурд хүчтэй гэгддэг “Ланд 200”-гаар шүү.
Жилдээ 2-3 удаа ажлын шаардлагаар зайлшгүй Улиастай орох болдог ч би дахиж тэр хэцүү замаар явахгүй гэж өөртөө “андгайлав”. Тэнгэрийн хөлөгөөр хоёр цаг орчим нисээд ирчих газарт заавал 6-7 цаг энхэл донхол, бартаа ихтэй замаар явах хэрэггүй байлаа. Дөрвөн жилийн дараа анх удаа Завхан аймгийг газраар зорьсон нь энэ. Замын турш Тосонцэнгэл ортол ч гайгүй. Тэндээс цааш Улиастай хүртэл 200 гаруй км зам л хүнд байна гэсээр. Гэтэл газар дээрээ байдал огт өөр болжээ. Тосонцэнгэлээс Загастайн даваа хүртэл хатуу хучилттай замаар сүнгэнэтэл давхилаа. Би ч “амаа” ангайж хоцров. Миний төсөөлж байснаас тэс өөр байсан болохоор тэр… 
УУЛЫН ОРОЙГООР ТАВИГДАХ ШОРООН ЗАМ ТУН УДАХГҮЙ…
Мэдээж нийслэлтэй хатуу хучилттай замаар холбогдоогүй ганц аймаг бол Завхан. Тосонцэнгэлээс Улиастай хүртэлх замыг хатуу хучилттай болгох ажил царцдаг, гацдаг байсан нь саяхан. Бүр тодруулбал, 2012 оноос хатуу хучилттай замтай болохоор төлөвлөж, төсөвлөсөн түүхтэй юм билээ. Харин гацаж, царцдаг замыг Хятадын хөнгөлөлттэй зээлээс үлдсэн хөрөнгөөр барих боломжийг аймгийн Засаг дарга Д.Батсайхан 2017 онд бий болгож, холбогдох бүхий л шатны удирдлагуудад танилцуулж гүйсээр замын ажлыг амжилттай эхлүүлсэн байдаг. Тэрээр аймгаа нийслэлтэй хатуу хучилттай замаар холбочихвол аймгийн иргэдийн амьжиргааны төвшинд мэдэгдэхүйц нөлөөлнө хэмээн хэвлэлд өгсөн ярилцлагадаа дурдсан байв. Үнэндээ ч аймгийн иргэдийн бизнес сэтгэлгээ, худалдаа наймааны эргэлт эрс сайжирсан байна лээ.
Завхан аймгийн Улиастай хот ирэх арваннэгдүгээр сарын эхээр бүрэн хатуу хучилттай замтай болж нийслэлтэй холбогдох аж. Одоо баригдаж буй Загастайн давааны замыг хоёр компани зэрэг барьж байгаа юм байна.
Биднийг замд явж байхад таарсан замын ажилчидтай ажлын нөхцөл байдлын талаар хэсэгхэн хөөрөлдөв. “Арж роуд” компанийн замын инженер М.Золбоо “Замын ажил хэвийн явж байна. Уулнаас ус бууж ирэх зурваст тохируулан ус зайлуулах хоолойнуудыг хийж байгаа. Зарим газраа нэг км зайтай бол зарим хэсэгт 200-300 метрт ч ус зайлуулах хоолойг сууриулуулах шаардлагатай байгаа юм” гэлээ. Хэдийгээр хур элбэгтэй байгаа ч ажлаа цаг хугацаанд нь дуусгахаар хичээж байгаагаа ярьсан замчид “Монголд анх удаа уулын орой дээр зам тавьж байгаа” хэмээн бардамнаж байсан юм.
“ХОЖИЛ МИНИЙХ” БАЙЖ БОЛОХГҮЙ…
Загастайн давааны 67 км замыг хоёр компани хоёр захаас нь барьж байгаа юм билээ. Хүнд ажлыг ажлын туршлага, сэтгэл зүтгэлээр давж байгаа нь илт. Харин хэвийн явж байгаа ажлыг “улаан, ногоон” хэмээн талцаад царцаачих вий. Аль эсвэл улстөржүүлээд “миний, чиний хийсэн ажил” хэмээн “оноо” авах хэрэгсэл болгочих вий гэх болгоомжлол байгааг нуух юун.
Таван жилийн тэртээ шатахууны үнийг бууруулж байх тэр үед нийслэлээс алслагдсан аймгуудад шатахууныг Улаанбаатартай ижил үнээр авах боломжийг бүрдүүлж байсан юм. Тэгтэл аймгаас сонгогдсон эрхэм гишүүд нь “Та нарынхаа төлөө би үүнийг хийлээ” гэж ирээд попроод байсан нь тун чиг муухай харагдаж байсансан. Түүнтэй адил нэгэнт эхлээд дуусах тийшээ хандсан ажилд “Хожил минийх” гэдэг шиг хандах хүмүүс олон бий… Тиймээс тэдэнд сануулчихъя, “Завханы шороон зам баяртай” болчихсон байна лээ шүү.
Д.Оюунчимэг
Эх сурвалж: “Зууны мэдээ” сонин
