Өнгөрсөн амралтын өдрүүдэд АНУ-ын хотуудад ази болон ази-америк гаралтай иргэд рүү чиглэсэн хүчирхийлэл, үзэн ядалт, ялгаварлан гадуурхалтыг эсэргүүцсэн тайван жагсаал болж өрнөлөө. Өнгөрсөн долоо хоногт АНУ-ын Атланта хотын гурван массажны газарт зэвсэгт халдлага гарсны улмаас найман хүний амиа алдсаны зургаа нь Ази гаралтай хүмүүс байсан юм. Сэжигтэн дээрх массажны газруудын хоёроор нь үйлчлүүлдэг байсан гэж цагдаагийн газраас мэдээлэл хийсэн байна.
Энэ явдлын дараа Америкт арьс өнгөөр ялгаварлан гадуурхахын эсрэг дорвитой алхам хийхийг шаардсан тайван жагсаал өрнөсөн юм. Судалгаанаас үзэхэд, өнгөрсөн жил АНУ-ын 16 том хотод бусдыг үзэн ядах, арьс өнгөөр ялгаварлан гадуурхсанаас үүдэлтэй гэмт хэрэг 7 хувиар буурсан ч азиудын эсрэг гэмт хэрэг 149 хувиар нэмэгджээ.
