“Үнэн гутлаа өмсөж байхад худал уул давж байдаг” гэдэгчлэн Х.Баттулгын 2021 оны Ерөнхийлөгчийн сонгуулийн нууц хөзөр бол “Сүхбаатарын Батболд” юм. Тэрээр нэг усанд хоёр ордоггүйн адилаар “Хужаагийн эрлийз” гэсэн сэдвээр дахин ялалт байгуулж чадахгүй. Тийм учраас оффшор гэдэг сэдэв дээрээ төвлөрч Сүхбаатарын Батболдыг гадны таван улсын шүүхэд өгсөн байгаа.
Тэнд үнэн худал тодрох хамаагүй бөгөөд Ерөнхийлөгчийн сонгууль хүртэл Сү.Батболдыг балбах, барих нь чухал. Үүнийг хар пиарын технологид “Мөсөн дээр гал түлэх” гэдэг бөгөөд Сингапур, ОХУ-д өргөн ашигладаг юм. Энэ нь шинэ арга бишээс гадна “Соц” нийгмийн үед ард иргэдийг “Гадны суртал ухуулга, харийн түрэмгийлэл” гэх мэт хий хоосон зүйлээр айлгадагтай адил юм. Х.Баттулга ойролцоогоор Сүхбаатарын Батболдыг 2-5 тэрбум ам.доллар оффшорт нуусан хэмээн дайрч байгаа юм.
Энэ мөнгийг Рио Тинто шиг нээлттэй компани болон, Монгол Улсын дотоодын зах зээлээс босгох ямар ч боломжгүй гэдгийг эдийн засгийн шинжээч Э.Энхцог логикоор нотлон мэдээлж байгаа ч ард иргэдээ тэнэг харанхуй гэж боддог Х.Баттулга зүтгэсээр, троллууд нь дайрсаар байна. Сүхбаатарын Батболдын асуудал юу ч болохгүйгээс гадна Ерөнхийлөгчийн сонгууль хүртэл барих гэж хичээж байгаа юм. Гэтэл түүний өргөдөл гаргасан гадны шүүхээс “Хэрэг биш, нотлогдохгүй байна” гэсэн хариунууд ирэхийг тооцоолоогүй бололтой.
