Арабын Нэгдсэн Эмиратын Абу Даби хотноо болж буй жүдо бөхийн ДАШТ-ий 48 кг-ын жинд Үндэсний шигшээ баг, “Сүлд” спорт хороо, “Имперо” группын тамирчин Бавуудоржийн Баасанхүү амжилттай оролцож, ДАШТ-ий хошой хүрэл медальт Ассунта Скуттог унаж шидэх мэхээр хаяснаар 24 насандаа дэлхийн аварга болж монголчуудаа баярлууллаа. Тэрээр энэ хавар Монгол Улсын аваргаар гурав дахиа тодорсон билээ.
Тэгвэл түүнийг ДАШТ-ий аварга болсны дараа Олон улсын жүдогийн холбооны эрхлэгч Николас Месснир баяр хүргэж, түүнтэй анх танилцаж байсан дурсамжаа жүдогийн холбооны албан ёсны хуудсанд байршуулжээ. Тэрээр Б.Баасанхүүтэй арав гаруй жилийн өмнө Монгол орны алс хязгаарт уулзаж байсан бөгөөд хамгийн анхны жүдогийн өмсгөлийг нь бэлэглэж байжээ. Тэрээр энэ дурсамжиндаа тухайн үед бэлтгэл хийх зориулалтын дэвсгэр буюу татами ч үгүй, өмсгөл ч үгүй байсан Мөрөн шиг ийм газраас дэлхийн дэвжээн дээр ирэх нь тийм ч амар хэрэг биш гэдгийг онцлон, бахархаж буйгаа илэрхийлжээ. Мөн Б.Баасанхүүгийн талаар жүдо бөхийн холбооны мэдээлэлд “тэр бүгдийг хүч чадал, өөртөө итгэлтэй байдлаараа ялсан.Түүний финалд хүрэх зам нь гайхалтай байсан бөгөөд нэг ч удаа хэн нэгэнд шидэгдэх дөхсөнгүй” хэмээн онцолжээ.
-НУТГИЙН БЯЦХАН ЖҮДОЧИДТАЙ УУЛЗАХАД ТЭГШ БУС ШАЛАН ДЭЭР ЭНГИЙН БРЕЗЕНТ ДЭВСЭЖ, БАЙГАА ХЭДХЭН ӨМСГӨЛӨӨ ЭЭЛЖИЛЖ ӨМСДӨГ АЖ-
Тус мэдээлэлд “Олон улсын жүдо бөхийн холбооны эрхлэгчийн хувьд би ярьж буй түүхийнхээ ард нуугдах үүрэгтэй. Их аваргууд, жүдочдид учирсан адал явдал ихэвчлэн ер бусын байдаг. Тэр дундаа дэлхийн аварга цолыг хүртсэн Бавуудоржийн Баасанхүү гэх энэ ер бусын тамирчны аялал илүү гэрэл гэгээтэй байна.
Би Б.Баасанхүүтэй арав гаруй жилийн өмнө Монгол орны алс хязгаар, Хөвсгөл аймгийн Мөрөн хот хэмээх нэгэн жижиг хотод анх танилцсан. Б.Баасанхүү тэр үед арав гаруй настай байсан ба хааяа жүдо бөхөөр хичээллэдэг байжээ. Нийслэл Улаанбаатараас 600 км-ийн зайд оршдог тус хотод тухайн үед 40 мянга хүрэхгүй хүн амьдардаг байв.Тэрээр тухайн үед жүдо бөхөөр хичээллээд удаагүй байхдаа энэ спортод дуртай болсон ч гэр бүлийнхээ байдлаас болж өдөр тутмын хэцүү, бэлтгэл сургуулилт хийх боломжгүй байсан юм. Гэвч түүний дэлхийн оргилд хүрэх энэхүү алхам тэр нэгэн айлчлал, уулзалтаас эхэлсэн юм. Олон улсын жүдо бөхийн холбооноос жүдо бөхийг дэлхий дахинд сурталчлах аяныг хүүхдэд зориулсан хөтөлбөрийн хүрээнд зохион байгуулсан. Энэ хүрээнд Монголд анхны “Улаанбаатар гранпри” тэмцээн болж, тухайн үеийн Монголын жүдо бөхийн холбооны ерөнхий нарийн бичгийн дарга Машбатын Бөхбат бид хоёр Монголоос шилдэг жүдочдыг олж нээх аялалд мордсон юм. Монгол Улсын Ерөнхийлөгчөөр ажиллаж байсан Халтмаагийн Баттулга бүх зүйлийг зохицуулсан.
-МИНИЙ ГАРААС АНХНЫ ӨМСГӨЛӨӨ АВЧ БАЙХДАА НҮДЭЭ БҮЛТИЙЛГЭЖ БАЙСАН ЗАЛУУ ОХИН ДЭЛХИЙН ДЭВЖЭЭНД ТӨРИЙН ДУУЛЛАА ЭГШИГЛҮҮЛЭХИЙГ СОНСООД БАХАРХЛАА-
Мөрөн хотод хүрэлцэн ирээд бид нэгэн сургуульд саатан нутгийн залуу жүдочидтой уулзлаа. Гэвч тэд жүдогийн ертөнцийн бүх зүйлээс хол байсан юм. Татами ч \зориулалтын дэвжээ\ байхгүй, тэгш бус шалан дээр энгийн брезент дэвссэн байв. Мөн жүдочид бүгдээрээ өмсгөлтэй байсангүй, байгаагаа хувааж хэрэглэдэг аж. Тиймээс Олон улсын жүдо бөхийн холбооны дэмжлэгтэйгээр бүх хүүхдүүдэд өмсгөл бэлэглэсэн. Дараар нь татами ч явуулсан юм. Тэнд зогсож байсан хэсэг хүүхдүүдийн дунд Монголын тал нутгийн цэнгэг агаарт хацар нь улайсан Бавуудоржийн Баасанхүү гэж нэгэн байлаа. Тэр өдөр би түүнд анхны жүдогийнх нь өмсгөлийг өгөх боломж олдсон нь миний хувьд нэр төрийн хэрэг байсан юм. Түүний хувьд ч мөн тэр өдөр л жүдо бөхөөр хичээллэхээр эргэлт буцалтгүй шийджээ.
Хэдэн жилийн дараа тэрээр дэлхийн дэвжээн дээр гарч эхлэх үедээ “Би Мөрөн хотод найзуудын хамтаар жүдогоор хичээллэж эхэлсэн. Тэр үед би энэ спортын талаар сайн мэдэхгүй байсан. Хэзээ ч цаашаа яаж явахаа төсөөлөөгүй байсан. Би татами ч гэж юу болохыг мэдэхгүй байсан. Гэхдээ нэг өдөр дасгалжуулагч бидэнд гадаадаас хэн нэгэн ирж байгаа талаар хэлсэн. Тэр хүн бидэнд онцгой бэлэг барьсан. Тэр өдрийг би үүрд санах болно. Энэ бол миний анхны жүдогийн өмсгөл байсан бөгөөд цасан цагаан байсан. Энэ гайхамшигтай бэлгийг хүлээн авсныхаа дараа л би жүдо бөхөөр илүү нухацтай хичээллэхийг хүсч байгаа юм болов уу гэж бодож эхэлсэн. Хэсэг хугацааны дараа өсвөрийн улсын аварга шалгаруулах тэмцээнд явсан. Тэр тэмцээндээ би цоо шинэ жүдогийн өмсгөлөө өмсөөд анхны хүрэл медалиа авсан. Тэр цагаас хойш жүдо миний амьдралын томоохон хэсэг болсон” гэж дурдсан юм.
-ТҮҮНИЙ ХҮҮХЭД НАСНЫ МӨРӨӨДӨЛ ҮРГЭЛЖИЛСЭЭР ПАРИСЫН ОЛИМПИЙГ ЧИГЛЭЖ БАЙНА-
Миний гараас анхны жүдогийн өмсгөлөө авахдаа нүдээ бүлтийлгэж байсан залуу охин дэлхийн дэвжээнд ялалтын гараа өргөн Монгол Улсын төрийн дууллыг эгшиглүүлэхийг сонсоод өнөөдөр дээрх дүр зураг санаанд бууж байна. Гэвч би хувьдаа Бавуудоржийн Баасанхүүгийн өнөөдөр Абу Дабид болсон тоглолтод ямар ч хамаагүй билээ. Тэрээр татамид ганцаараа гарсан бөгөөд Монголын шигшээ багийн хамт олон жил бэлтгэл хийж, өөрийгөө золиосолсоны үр дүн энэхүү ялалт юм.
Олон улсын жүдо бөхийн холбоо болон нийт жүдо бөхчүүддээ баярлалаа гэж хэлмээр байна. Мөрөн шиг ийм газраас дэлхийн дэвжээн дээр ирэх нь тийм ч амар хэрэг биш, бид бүгдээрээ бахархаж байна. Өнөөдөр Бавуудоржийн Баасанхүүгийн өдөр байлаа. Хэдийгээр Абу Даби дахь бодит байдал түүний хүүхэд насны мөрөөдлөөс давсан байсан ч түүний мөрөөдөл үргэлжилсээр, Парис 2024 наадам руу чиглэж байна. Ирээдүй хойч үедээ урам зориг өгөх үүрэгтэйг онцлохын тулд би үүнийг бичихийг хүссэн юм. Мөн бидний Монголд хийсэн аялал ийнхүү хожмын гайхалтай зүйл болсонд баяртай байна. Өдөр бүр мянга мянган дасгалжуулагчид шавь нартаа урам зориг өгдөг. Бавуудоржийн Баасанхүү болон хэзээ нэгэн цагт ямар нэгэн зүйл дамжуулах завшаан тохиож байсан бүх хүмүүстээ баяр хүргэе” гэжээ.
