Москва Улсын Их Сургуулийн нэгэн оюутан “Wi-fi” интернэт төхөөрөмжийн нэрээс болж Украиныг дэмжсэн хэргээр арван хоног хоригдох шийтгэл авчээ. Москвагийн шүүх тус оюутныг “хэт даврагч байгууллагын бэлгэдэл”-ийг олон нийтэд тараасан хэргээр шийтгэсэн байна. Тодруулбал,хоригдох ял авсан оюутныг өнгөрсөн долоо хоногийн Лхагва гаригт баривчилсан ба интернэт сүлжээ дамжуулагч ”Wi-fi” төхөөрөмжийн нэрээ “ Слава Украини” гэж нэрлэн олон нийтэд интернэт цацдаг байжээ. Цагдаа нар дотуур байрны өрөөнд нэгжлэг хийн, “Wi-fi” төхөөрөмжийг салгасан ба бусад сурагчдын интернэт сүлжээний нэрийг шалгасан гэж шүүхийн баримт бичигт дурдсан байна. “Слава Украини” нь Украиныг дэмжигчид болон түрэмгийллийн эсрэг жагсагчдын гол уриа болсон дуу юм.
Тус оюутныг “нацистуудын бэлгэдэл буюу хэт даврагч байгууллагуудын бэлгэдлийг олон нийтэд харуулсан” хэмээн буруутгасан. ОХУ-ын Ерөнхийлөгч Владимир Путин Украинд “неонацист дэглэм” бий болсон тухай ор үндэсгүй мэдэгдлийг удаа дараа гаргаж, түүгээрээ түрэмгийллээ зөвтгөсөн гэж шинжээчид үзсэн. Баривчлагдсан оюутан бол дайны талаарх өөрийн үзэл бодол, үйлдлийнхээ төлөө шийтгүүлсэн олон мянган хүний нэг. Үүний адил өнгөрсөн сард Хойд туйлын тойргийн шоронд сажигтэй байдлаар амиа алдсан сөрөг хүчний удирдагч Алексей Навальныйгийн дурсгалд цэцэг өргөсөн олон зуун иргэд саатуулагдсан. Украинд болж буй түрэмгийллийг Орост “дайн” гэж нэрлэхийг зөвшөөрдөггүй бөгөөд “цэргийн тусгай ажиллагаа” гэж нэрлэх ёстой талаар олон улсын агентлагууд мэдээлсэн.
Эмнести Интернэшнлийн мэдээлснээр өнгөрсөн онд Оросын засгийн газар 21 мянга гаруй хүнийг “дайны эсрэг тэмцэгчдийг дарах” зорилгоор хэлмэгдүүлсэн байна. Хүний эрхийн байгууллагууд Оросын засгийн газрыг буруутгаж, шудрага бус шүүлтээр энгийн иргэдийн үзэл бодлыг хааж, торгуулиар “амыг нь хааж байна” гэж үзжээ.
Эх сурвалж: BBC
