Цар тахлын улмаас Улаанбаатар хотод хатуу хөл хорио тогтоосонтой холбоотойгоор эмнэлгийн тусламж үйлчилгээ авахаар түр хугацаанд нийслэлд ирсэн орон нутгийн зарим иргэд хоноглох газаргүй байна. Гэтэл хотын иргэд хөл хөдөлгөөн хорилоо, амьдрал хэцүүдлээ гэх зэргээр тэвчээргүйгээ гайхуулж суух нь хэтэрхий өөрийн амин хувиа бодсон асуудал болоод байх шиг. Хотын дүүргүүдэд уулзвар бүрт л цагдаа хүчний байгууллагынхан өдөр шөнөгүй төр засгын шийдвэрийг иргэдэд ухамсарлуулж ойлгуулах гэж тэсгим хүйтэнд хоолтой хоолгүй зогсож байгааг хүндлэх л хэрэгтэй. Ингэж гэмээнэ иргэнийхээ үүргийг биелүүлж байгаа хэрэг. Тэдэнд хэлсэн үгийг нь дагаад журмаа мөрдөх нь хамгийн том тус юм. Гэтэл ямаан омогтой нэг биш иргэд цагдаагийн тавьсан шаардлагад эсэргүүцэл үзүүлж асуудалд ороод байгааг цахим орчинд харсан байх.
Бас нэг асуудал нь хөдөө орон нутгаас хурал цуглаан, эмнэлгийн бараа харахаар ирээд хөл хорионд орсон иргэдийн асуудал хурцаар яригдаж байна. Тэдний нэг жишээ нь Орхон аймгаас Улаанбаатар хотод томографын шинжилгээ хийлгэхээр эхнэрийн хамт Улаанбаатар хотод ирсэн иргэн Л.Билэгтсайханы хувьд 11-р сарын 10-ны үүрээр хотод ирсэн ч хатуу хөл хорио тогтоосны улмаас гэртээ харьж чадалгүй, өнөөдрийг хүртэл эхнэрийн хамт машиндаа хонож байгаа юм. Тэрээр хорт хавдартай бөгөөд санхүүгийн хувьд маш хүнд байгаагаас гадна хотод ажиллаж байгаа буудал байхгүй, мөн очих айлгүйгээс ийнхүү гадуур хоноглож байгаа юм. Телевизээр энэ талаар дамжуулж бусдаас тусламж хүссэн нь элэг нэгт Монголчуудад хүндээр туссан байх нь гарцаагүй. Олны дунд боломжтой, нийгмийн хариуцлагаа ухамсарладаг хүн байлгүй л яахав.
Тэдний талаар сошиал орчинд мэдээлэл гарсны дараахан Алтандорнод монгол компанийн захирал Тордайн Ганболд машиндаа хоноглож байгаа гэр бүлийн хоёрт сайн санааны гар сунгаж өөрийн зочид буудалд яаж ийгээд хүрээд ир хэмээн урьжээ. Байгаа мөнгөөрөө хоол талх хиам, бэлэн хоол, машиндаа бензин аваад бараг дуусаад арга нь барагдсан хоёрт маань ийнхүү тусламжын гараа сунгажээ. Тэд хорио цээрийн дэглэм дуустал Корпорэйтэд байрласан эсэхийг эргэн мэдээлэх болно. Тэвдэж явахад тэвнээр тусал ч гэдэг ардын сайхан үг бий дээ.
