Цар тахал дотооддоо алдагдсантай холбогдуулан үзвэр үйлчилгээний газруудыг хаасан, тоглолтуудыг цуцалсан. Халдвар эрчимтэй тарах нөхцөлийг хамгийн их бүрдүүлсэн хүчин зүйл нь УБ палас, Соёлын төв өргөө зэрэг газруудад болсон Эмоци продакшний хошин шоу тоглолт, Дуучин Дэмбэрэлнямбуугийн анхны бие даасан тоглолтыг үзсэн хүмүүс ямар ч хяналтгүй хөдөө явах нь явж, гадуур бусад хүмүүст халдвар тараасан болох нь тогтоогдоод байгаа юм. УОК-оос тус тоглолтыг үзсэн хүмүүс яаралтай шинжилгээ өгөхийг сануулсаар байвч иргэд ухамсар доройн үүднээс төдийлөн өөрсдийгөө болон бусдын амь нас, эрүүл мэндийг бодохгүй гэртээ нуугдаж байгаа нь манай Монголчуудын амин хувиа хичээсэн бэртэгчин зан гэлтэй. Хол хорионоос болж бэлтгэл ажилдаа өч төчнөөн зардал гаргасан зарим дуучид маань санхүүгийн хүндрэлд орж байгаа нь лавтай. Гэвч аюулт цар тахлын дэргэд энэ бол багахан асуудал гэж л бодож үзэхээс өөр арга алга. Ямартай ч зарим уран бүтээлчдээс холбогдож үүссэн байдлыг тодрууллаа.
Гурван охин хамтлагийн ахлагч Соло: Манай хамтлаг Зайсан хилийн эвент халлд ‘The One night with three girls’ тоглолтоо хийхээс яг нэг өдрийн өмнө цар тахлын халдвар дотоодод тархаж тоглолт маань харамсалтайгаар цуцлагдсан. Тус танхим 1000 хүний суудалтай учраас бид VIP тасалбараа 150,000, энгийн тасалбараа 40,000 төгрөгөөр худалдан борлуулсан. Манай тоглолтыг үзэхээр ойролцоогоор 760 гаруй хүн билетээ худалдан авчихсан байсан ч давагдашгүй хүчин зүйлийн улмаас тоглолтоо хийж чадсангүй. Бид дээрх тоглолтоо хийхийн тулд бүжиг, хувцас, гэрэлтүүлэг, концертын танхимын түрээс, тасалбар хэвлэлт болон бас бус зардлуудад нийтдээ 20 орчим сая төгрөг зарцуулсан байсан. Үүнээс зургаан саяыг нь бид гурав гаргаж, үлдсэн зардлыг тоглолтыг зохион байгуулагч залуу босгосон.
Коронавирусийн халдвар намжиж, цаг сайхан болохоор бид бүхэн ‘The One night with three girls’ тоглолтоо заавал хийнэ. Тэр болтол та бүхний минь худалдан авсан тасалбар хүчинтэй гэдгийг үзэгчдэдээ хэлье. Гэхдээ тасалбараа буцааж мөнгөө авах боломж хүн бүрд нээлттэй. Тасалбараа буцаахгүйгээр бидний тоглолтыг үзсэн бүх үзэгчдэдээ гарын бэлэг өгнө.
“Хун галуу” тоглолтын зохион байгуулагч Д.Тэгшээ: МУСТА, дуучин Д.Отгонжаргал Улаанбаатар паласын концертын их танхимд арваннэгдүгээр сарын 14-ний өдөр “Хун галуу” тоглолтоо хийхээр товлож бүх бэлтгэлээ базаачихсан байсан. Харамсалтай нь тоглолт болохоос гурав хоногийн өмнө бүх нийтийн бэлэн байдал зарлагдаж товлосон тоглолт цуцлагдчихлаа.
Манай дуучны хувьд тоглолтын бүх бэлтгэлээ 100 хувь базаагаад дуусчихсан, хөгжим, гэрэлтүүлэг, хувцас, тоглолтын найруулга, заалны түрээс гэх мэт тоглолтод шаардлагатай бүхий зүйлийн зардалд ойролцоогоор 20 орчим сая төгрөгөө зарцуулчихсан байсан. Үзэгчдийн худалдаж авсан тасалбарын тоог яг одоогоор нарийвчилж гаргаагүй байна. Гэхдээ худалдаж авсан тасалбарууд хүчинтэй гэдгийг албан ёсоор хэлье. Цаг наашилж бүх нийтийн хорио цээр тавигдсаны дараа 2021 оны гуравдугаар сард ‘Хун галуу’ тоглолтоо хийхээр төлөвлөж байгаа.
Тасалбар авсан иргэдийн хувьд бидэнтэй хэзээ ч эргэн холбогдож буцаалт хийх боломж нээлттэй. Гэхдээ иргэдийн хөдөлгөөнийг хязгаарлачихсан байгаа энэ онцгой үед бас бөөгнөрөл үүсгэж, билет буцаах боломж хомс гэдгийг ойлгоорой. Бүх нийтийн хорио цээр цуцлагдмагц тасалбараа буцаая гэсэн иргэдэд мөнгийг нь ямар ч шимтгэлгүй олгох болно. Харин тасалбараа буцаахгүй тоглолтоо үзнээ гэвэл та бүхний тасалбар хүчин төгөлдөр хэвээр байгааг хэлье.
Дуучин Укагийн төрсөн дүү Заяа: ‘DO IT’ тоглолт цуцлагдсантай холбоотойгоор мэдэгдэл гаргасан байгаа. Үүнээс өөр мэдээлэл өгөх боломжгүй.
