УИХ-ын гишүүн боллоо л бол хаан, эзэн гэж андуурдаг нялх сэнгүмүүд олон. Үе үеийн УИХ-д шинээр сонгогдсон нөхдүүд эхэндээ биеэ авч явах байдал, хувцаслалт, хэлж буй үг, үйлдэл бүр дээрээ туршлагагүйтэж олны хэл амны бай болдог бөгөөд энэ нь 4 жилдээ хусавч арилахгүй цол гуншин болдог нь бичигдээгүй хууль гэлтэй.
УИХ-д олонтоо сонгогдсон хашир бурхиуд ‘Шинэ гишүүдээ поп зан гаргахад нь ч эхэндээ сүүлээ өргөөд тугал шиг их оодогнож байна даа, ард түмэн ч байранд нь тавиад өгдөг юм’ хэмээн харж суудаг аж. Анужин гишүүн дээлний хээ ярьж онигоонд орсон бол хэд хэдэн гишүүд албан бус гуншинтай болжээ.
Ахмад гишүүн Б.Бат-Эрдэнэ гишүүн нэр бүхий гишүүдийг амны хаалтаа зүүсэнгүй хэмээн ихэд бухимдаж, зэмлэж харагдсан. УИХ-н гишүүдээсээ эхлээд заасан хууль дүрэм, журмаа ягштал биелүүлэхгүй том толгойлоод байвал ард иргэд ингэж болдог юм байна гэж буруу үлгэр дуурайлал авах нь асар их хортой нөлөөлөл.
Зүй нь УИХ-ын гишүүд заавал хэн нэгний шаардлагаар бүх нийтээр дагаж мөрдөх шаардлагыг биелүүлэх ёстой гэж үү. Энэ парламентад шинээр орж ирсэн Г.Дамдинням үүргээ гүйцэтгэж яваа цагдаад өөрийгөө таньсангүй хэмээн омогджээ. УИХ-д ороод жил ч болоогүй Дамдинням байтугай дөрвөн жил болоод олонд танигддаггүй гишүүд олон. Тэгээд ч цагдаа болгон УИХ-н гишүүдийг хараад бөхөлзөж, нахилзаж, тал засах албагүй. Төрийн үүргээ биелүүлээд ажлаа хийж яваа төрийн албан хаагчийг өөрийг нь таньсангүй бараг л хадаг сүүтэй угтаж авсангүй гэж цамнах нь дэндүү ичгүүртэй хэрэг. Гадаадад явж сургууль соёл дүүргэсэн хүн уг нь соёлтой харьцаа гэдгийг мэдмээрсэн. Дамдиннямыг судлаад үзэхэд яаманд зөвлөх хийж байхдаа мөнгө төгрөгний асуудалд орооцолдон аавын хаалга татах шахуу юм болоод арай гэж мултарсан бөгөөд түүнийхээ дараа гадаад руу сурахаар арилж өгсөн тийм ч нэр цэвэр нэгэн биш гэж сонсогддог юм билээ.
УИХ-ын гишүүн Г.Дамдинням хэлэхдээ ‘Би УИХ-д ороод ард түмнийхээ төлөө их юм хийсэн. Ард түмэн намайг мэднэ. Гэтэл замын цагдаа намайг танихгүй машааныг маань зогсоож, хэн бэ, хаана ажилладаг бэ гэхчилэн саатууллаа. Цагдаагийн харьцаа, хавьталд анхаарах зүйл байна. Миний ард түмний төлөө их үйлсийг саатуулж, ард түмнийг хохироолоо. Энэ асуудлаар Хуульзүйн сайдад хандаж шийдвэрлэж өгөхийг хүссэн. Хэвлэл мэдээлэлд хандаж байна’ гэжээ.
Залуу гишүүд дундаасаа харьцангуй зөв пи-артай яваад байсан мань залуу гишүүн ийнхүү залуу насны овилгогүй зангаасаа болж нэр хүнд, рейтингээ өөрөө унагаад авлаа. Төрийн хүн гэдэг ард түмний хүндлэл хүлээдэг төлөв түвшин, үлгэр жишээч хүн байх ёстойг түүнд эрхбиш ахмад улстөрчид заагаад өгөх байлгүй дээ.
