Хөлбөмбөгийн хаан Пелегийн биеийн байдал дордсоор ар гэрийнхэнтэйгээ салах ёс гүйцэтгэсэн талаар бид өмнө мэдээлсэн. Тэгвэл өчигдөр 82 насандаа таалал төгслөө.
Хөлбөмбөгийн хаан Пеле хоёр жилийн өмнө хорт хавдартай гэж оношлогдсон юм. Тэрээр өнгөрсөн сарын сүүлээр Сан Паулугийн эмнэлэгт хэвтсэн бөгөөд хэвлэлээр гарсан цуу яриаг үгүйсгэж, “Бие сайн байгаа, хими эмчилгээний үр дүнгээ шалгуулах, дараагийн эмчилгээгээ товлох гэж эмнэлэгт хэвтсэн” хэмээн тайлбар хийснийг бид мэдээлсэн.
Сэтгүүлч Мигель Анхель Веласкес твиттер хуудастаа “Сантос” оршуулгын ёслолд бэлдэж эхэлсэн. Клуб талбай дээрээ асар том асар босгож, мөн Пелегийн дүрс бүхий том алтан авс бэлдсэн” гэж байжээ.
Пеле тоглогчийн хувиар ДАШТ-д гурвантаа түрүүлсэн цорын ганц хөлбөмбөгч, шигшээ багтаа 92 тоглохдоо 77 гоол оруулж дээд амжилт тогтоосон байсныг нь өнгөрөгч ДАШТ-ий үеэр Неймар эвдсэн юм.
Хаан. Тиймээ, түүнийг “Хөлбөмбөгийн хаан” гэдэг. Жинхэнэ нэр нь Эдсон Арантис ду Насименту. Хөлбөмбөгийн ертөнцөд Пеле хэмээх хоч нэрээрээ алдаршиж, хүмүүн төрөлхтөнд “Хөлбөмбөгийн хаан” гэж өргөмжлөгдсөн билээ л.
Тэрбээр хөлбөмбөгийн дэлхийн аварга цолыг гурван удаа хүртсэн манай гариг дээрх цорын ганц хүн. Дөрвөн жилд болдог хөлбөмбөгийн дэлхийн аварга цол шиг эрхэм хүндтэй мөртлөө хүрэхэд хамгийн хэцүү цол ховор. Олон олон хөлбөмбөгийн супер одууд хүрч , хүртэж чадаагүйг та бид мэднэ. Өнөө цагийн баатрууд, сүүлийн 20-иод жил хөлбөмбөгт “ноёрхсон” хоёр буюу Криштиану Роналду, Месси хоёр гэхэд л нэг нь дэлхийн аварга цолд ойртоо ч үгүй, нөгөө нь бүтэн замналынхаа төгсгөлд анх удаа хүртэж бөөн юм болж байна.
Гэтэл Пеле энэ ховор дэлхийн аварга цолыг гурван удаа хүртэж байв. 18 настайдаа, 22 настайдаа, гучтайдаа. Домогт Марадонад алтан цом өргөх завшаан ганц л олдож байсан. Үе үеийн шилдэг хөлбөмбөгчдийг, гоц авьяастнуудыг “Шинэ Пеле” хэмээн нэрлэдэг ч “Хөлбөмбөгийн хаан”-тай эн зэрэгцэх бүү хэл дөхөж очих ч хөлбөмбөгчин байсангүй ээ. Замбуулин хорвоод нэг л нар байдаг лугаа хөлбөмбөгт ганцхан хаан бий. Тэр нь Пеле гэдэгтэй хэн ч маргахгүй биз. 21 жил мэргэжлийн түвшинд тоглож, 1363 тоглолтод 1279 гоол оруулсан Пелегийн тоглолтыг үзэх гэж дайтагч талууд гал зогсоож, түүний намтар номыг уншихаар сая сая хүн бичиг үсэг сурч байсан билээ.
2022 оны арванхоёрдугаар сарын 29-нд 82 насандаа “Хаан” Пеле хорвоогийн мөнх бусыг үзэж, тэнгэрийн орныг зорилоо. Тайван нойрс доо , “ХААН” минь! Сая сая хөлбөмбөгт хайртай хүн бүхний сэтгэл зүрхэнд мөнхөд “АМЬД” байх болноо, ПЕЛЕ!
Ц.ЭнхтүвшинТаван цагариг сонин 12.29.2022
