Жилийн өмнө Түвшинжаргалаас салах өргөдлөө өгөн хөрөнгө хуваах маргаан дэгдсэн бөгөөд тэдний талаар хэвлэлээр шуугиад одоо ч намжаагүй байна. Шүүхийн шийдвэр Чимэдцэеэгийн талд гарсан гэх бөгөөд лизингээ төлөх гэж ард түмний хайртай ардын жүжигчин маань тоглолтоо хийхээр төлөвлөөд байна. Байрны төлбөр нь 360 сая төгрөгөөр үнэлэгдсэн гэх бөгөөд урлагийн буянд ямар ч байсан ихэнхийг нь төлж барагдуулж байгаа гэнэ.Тэрээр ‘Эрүүл байвал болох биз дээ.
Өөрийн болоогүй байгаа хөрөнгөд шунаад яахав дээ. Үр хүүдийнхээ амьдралд тээг болж л байгаадаа зовох юм. Бурхан харж байгаа. Үнэн мөнийг ялгаад өгнө.10 гаруй жил нэг гэрт жаргал зовлонгоо хуваалцан амьдарсан нас тогтсон хань минь ийм хүний санаанд оромгүй ааш авир, үйлдэл гаргасанд хүмүүс их цочирдсон байх л даа. Бид хоёр хамт амьдарсан нэр л зүүсэн болохоос биш Түвшээ маань манайд ирэн очин л явдаг байлаа. Түүнийг байсан байгаагүй би бүгдийг болгосоор л ирсэн. Би ер нь амьдралын ухаан муутай хүн юм гэж өөрийгөө дүгнэж эхлээд байгаа. Хүнд голдоо ортлоо гомдож чаддгүй хүн шиг байгаа юм.
Намайг хүнд байдалд оруулсныг нь ард түмэн сонсоод түүн рүү ямар их дайрч байнаа. Тухайн үед надад элдэв янзын үгтэй зурвас, заналхийлсэн дуудлага ирдэг л байлаа. Надад үлдсэн зовлонг би өөрөө үүрэх ёстойг би ойлгосон. МУГЖ Баясгаланг аавдаа байр өгсөн гэж нэг хэсэг шуугисан. Яг үнэндээ Түвшин маань манайд амьдарч байхад уламжлалт цагаан сарын баяраар ирж золгодог байсан Баясгалан. Тоглолтоо хийх болоход нь би ганц хоёр дээлнээ өмсүүлэх ч гэдэг юмуу харилцаа сайхан л байлаа.Түвшээ бид хоёрыг гэрлэлтээ цуцлуулсны дараа Баясааг надад байр өгсөн гэж цуурч эхэлсэн.Тийм юм огт байхгүй. Надад хоолой байна, ухаан, чадал ч байна. Өөрийнхөө хүчээр өөрийгөө аваад л явчихна. Олон түмэн минь их дэм болж байна. Ард түмэн, сонсогч түмнийхээ хүчээр л би Ардын жүжигчин болсон.
Дээхэн үед бэр маань хүнд өвдөөд, би осолд ороод нэг хэсэг хүнд л байлаа. Бүр хэцүүдээд түмэн олноосоо тусламж гуйхад хүртлээ дордсон. Хандивын тоглолтоо ч хийж үзлээ. Нилээн удаж байж хөл дээрээ босохтойгоо болсон. Ард түмэн гэдэг чинь ид шид л гэсэн үг юм билээ. Би чинь азтай олон түмний хайран дунд амьдарч яваа хүн. Надад бурхан олон зүйлийг харамгүй өгсөн. Гэхдээ амьдрал тэгш байдаггүй юм билээ. Хорвоогийн жам юмуу даа надад ханийн заяаг л харамлаж дээ гэж боддог юм’ хэмээн олон түмний энэ их талцал, хэрүүл, хардлагад цэг тавьсан үгээ сэтгэлээ онгойтол хэлжээ
