УИХ-н олон гишүүд мэдээлэлд ойр, давуу эрхээ далимдуулан жижиг дунд үйлдвэрлэлийг хөгжүүлэх сангаас буюу улсаас хэдэн зуун саяар нь зээл авч хувийн бизнесээ өөд нь татсан. Тэдэн дундаас авсан зээлээ өдөрт нь төлчихдөг тэрбумтнууд ч байлаа. Энэ нь жирийн ард иргэдийг дэндүү басамжилсан зохион байгуулалттай “дээрэм” байсныг бүгд мэднэ. Санаачилж гардан хэрэгжүүлсэн гэх нэр зүүж улс төрийн карьертаа цэг тавьсан Б.Батзориг гэх экс гишүүн бий. Мөн түүнийг шахаж, шавдуулсан маш олон улс төрчдийн нэрс хэвлэлүүдээр нэг гарсан. Тэдэнтэй хатуу хариуцлага тооцож байна гэж Ерөнхий сайд маань эхнээс нь “цавчиж” явах газар руу нь явуулсан. Гэхдээ бүгд биш.
Тэдэн дундаас ЖДҮ-гийн хэргээрээ 2,6 жилийн хорих ял авсан Б.Ундармаагийн хорих ялыг 40 сая төгрөгийн торгох ялаар сольсон нь ихээхэн шуугиан тариад байна. Тэрээр 2011 онд гадаадад олон улсын эмэгтэйчүүдийн байгууллагын ажлаар явж байгаад ухаан алдаж унасан гэнэ. Үүнээс хойш Орос, Өмнөд Солонгосд тус, тус хагалгаанд орж байжээ.
Өдгөө бие нь муу, чанга дуугарч ярьж ч болохгүйд хүрчээ. Тэрнээс хойш сэтгэл санааны хямрал цочрол нь ихсэж бие нь улам л мууджээ. Ингээд эрүүл мэндийн шалтгаанаар ялыг хөнгөрүүлэх нэгэн нөхцөл болгож ‘ойлгож хүлээж аваарай ‘хэмээн шүүх бүрэлдэхүүнээс хүссэн гэх. Өвчин зовлонг яалтай ч билээ гэж үзэж болох боловч бүхэл бүтэн банкны захирал, Бишрэлт гэх Монголын томоохон группын эзэн хүнд хууль дэндүү ялгаатай хандлаа хэмээн бачуурах хүн захаас аваад гарч байна. Ер нь төрийн томоохон албан тушаалтнууд хэрэгт холбогдон яллагдах дээрээ тулахаараа эдгэшгүй хүнд өвчин тусдаг, үхэл сэхэлийн ирмэг дээр очоод суллагддаг, гадаад руу ‘эмчлүүлэх’ нэрээр зугатаадаг ‘гарц’ хэдийнээ бий болсон гэхэд хилсдэхгүй.
Иргэдийн хамгийн их эгдүүцэж байгаа нь мөнгө төгрөгтэй, эрх мэдэлтэй, арын хаалгатай хэн нэгэн нь мөрдөн байцаах шатанд хэргээ хүлээсэн, хоригдох үедээ номхон хүлцэнгүй байсан, хохиролоо барагдуулсан гэх үндэслэлээр түүнийг торгоод сулласан нь гайхал төрүүлээд байгаа юм. Бусад хүмүүс тэгвэл энэ мэтчилэн барьцаад эхэлбэл шүүх байгууллага яаж хандах нь эргэлзээтэй л юм.
