УИХ-ын дэд дарга С.Одонтуяа: Сонгуулийн тогтолцоог зайлшгүй өөрчлөх шаардлагатай байна. Нэг намын хэт давамгайлал улс орны хөгжлийн гацааг гаргаж чадахгүй байна. Өнөөдөр Монгол Улсад улс төр, эдийн засгийн хямрал болж байна. Ер нь болж бүтэж байгаа зүйл алга хэмээн иргэд жагсаж байна. Энэ бүгдийн суурь шалтгаан нь юу вэ гэхээр сонгуулийн тогтолцоо. Өнөөдрийн сонгуулийн мажоритар тогтолцоо энэ олон хямралыг авчрах үүд хаалгыг нээж өгч байна.
2020 оны сонгуулиар санал өгсөн хүмүүсийн зөвхөн 42 хувь нь МАН-д саналаа өгсөн боловч эрх баригч нам Засгийн газар, УИХ-д хэт олонх байна. Тийм учраас сонгуулийн тогтолцоог өөрчлөхгүйгээр улс төрийн хямралаас салахгүй гэдгийг хэлмээр байна. Монгол Улсын нэгдсэн төсвийг баталж байгаа хэдий ч тойргийн төсөв баталдаг тогтолцоо бий болоод удаж байна. Иймээс Үндсэн хуульд нэмэлт өөрчлөлт хийж, сонгуулийн тогтолцоог өөрчлөх шаардлагатай.
МҮАН-ын ерөнхий нарийн бичгийн дарга Б.Цогтгэрэл: 2019 онд Үндсэн хуулийн нэг том өөрчлөлт бол намчирхдаг, талцдаг байдлыг бууруулах, сааруулах бүхэл бүтэн бүлэг явж байсан. Харамсалтай нь МАН тус асуудлыг авч хаясан. Орон нутагт намчирхал хэрээс хэтэрлээ. Үүний улмаас сонгуулийн эдийн засагтай орон болж хувирлаа. Үндсэн хуульд нэмэлт өөрчлөлтөд намчирхал болон эдийн засгийн асуудлыг зайлшгүй авч хэлэлцэх ёстой.
Үнэн ба зөв намын дарга А.Отгонбаатар: Тогтолцооны алдааг засахын тулд улс даяараа нэг тойрог буюу пропорционал тойрогтой болох хэрэгтэй. Ингэснээр хамгийн чадвартай аавын хүү сонгогдож, Төрийн ордонд өөрчлөлтийн салхи сэвэлзэнэ. Тогтолцоог өөрчлөхгүй бол бид v.. x.л. и.й.н тойргоос гарахгүй. Хоёрдугаарт, УИХ-ын гишүүдийн тоог нэмэгдүүлж, тэдний халдашгүй эрхийг нь цуцлах хэрэгтэй. УИХ-ын гишүүдийн тоог 200 хүртэл нэмэгдүүлэх шаардлагатай.
ХҮН-ын дарга Т.Доржханд: Өнөөдөр Засгийн газраас УИХ-д төсвийн тодотгол оруулж байна. Хэрэв 10-20 хувийн хэмнэлт хийх төдий зүйл байвал бид хүлээн авахгүй, залуучууд дахин жагсана шүү. Өнөөдөр улс төрийн намын төлөөллүүд ярилцаад Ерөнхийлөгч У.Хүрэлсүх, УИХ-ын дарга Г.Занданшатар, Ерөнхий сайд Л.Оюун-Эрдэнэд Үндсэн хуульд нэмэлт, өөрчлөлт оруулах асуудлаар шаардлага хүргүүлж байна. Улсын төсвийн тодотголоор үр дүнтэй хэмнэлтийг хийж чадахгүй бол улс төрийн намууд залуучуудаар төв талбайг дүүргэнэ шүү гэдгийг хэлмээр байна. Хоёрдугаарт, Үндсэн хуульд нэмэлт, өөрчлөлт оруулах асуудлыг улс төрийн бүх хүчнийг хамруулж яаралтай ярилцъя гэж байна. Сонгуулийн тогтолцоог өөрчлөх, эдийн засгийн аюулгүй байдлын асуудлыг яаралтай хэлэлцэх, УИХ-ын гишүүдийн тоог нэмэгдүүлэх асуудлыг хэлэлцье. 76-гаагаа өсгөе. Судалгаагаар гишүүдийн тоо хамгийн багадаа 150-215 гэдэг тоонууд гарч ирж байна. Ингэснээр нэг УИХ-ын гишүүн дээр ирэх кнопын эрх мэдэл буурна. Үр дүнд нь авлига буурна. Залуучуудаа парламентад оруулж ирэх хэрэгтэй.
