Ерөнхий сайд Л.Оюун-Эрдэнэ өнөөдөр ТОП-100 аж ахуйн нэгжийн захирлуудтай уулзав. МҮХАҮТ-д болсон уулзалтын үеэр Ерөнхий сайд энэ оны улсын төсвийг тодотгох шаардлага тулгарсан гээд ямар зардлуудыг хэмнэх болсноо танилцуулав.
Тэрээр хот дотор дарга нар том оврын машин хэрэглэхгүй, зочин хүлээн авах зардал гаргахгүй, хурал зөвлөгөөнийг цахимаар хийнэ. Томилолтоор явахдаа бизнес ангиллаар нисэхгүй. Бизнес ангиллаар нисэх бол энгийн ангиллын тийзний зөрүүг тухайн албан хаагч өөрөө нэмж төлнө гэв.
Дараа нь хувийн хэвшлийн төлөөллүүд үг хэлж, асуулт асуусан юм.
Наран группийг төлөөлж оролцсон Д.Удвал “Бид ажиллах хүчний хомстол орж, компаниуд хүнээ булаацалдаж байна. Төрийн албан хаагчийн цалин бага байтал маш олон хүн ажиллаж байна. Хувийн хэвшлийн олгодог цалин хамаагүй өндөр болсон. 1.8 сая төгрөгийн цалинтай борлуулагч, түгээгч ажилд авах гээд чадахгүй байна. Төр данхар бүтэцтэй, бүтээмж багатай. Төрийн албан хаагчдыг цомхтговол тэр хүмүүс хувийн хэвшилд ажиллах боломжтой. Ялангуяа барилгын салбарт ажилчид олдохгүй байна. Барилгын ажил гүйцэтгүүлэх зардал гурав дахин өссөн тул зарим төслөө хойшлуулахад хүрсэн” гэв.
Эдийн засагч Б.Лхагвасүрэн “2013 онд Монголбанк 2.7 их наяд төгрөг хэвлэх ажилд Сангийн сайд Б.Жавхлан гар бие оролцсон. Энэ алдаагаа битгий давтаарай. Манай макро эдийн засагт томоохон цочроо үүсэх гэж байгааг эртнээс сануулах хэрэгтэй. НӨАТ-ын буцаан олголт одоо 2 хувь байгааг нэмэх нь зөв. Одоо хэрэгжүүлэх Үнэ тогтворжуулах хөтөлбөрийн бүх мэдээлэл ил тод байх ёстой. Өмнөх хөтөлбөрийн улмаас зарим хүн шоронд байна” гэсэн юм.
Уулзалтад Засгийн газрын бүх гишүүн оролцов. Сангийн сайд Б.Жавхлан “Аливаа тусгаар улс бүр өөрийн Төв банктай байдаг. Төв банк мөнгө хэвлэх нь түүний бүрэн эрхийн асуудал” гэв.
Мөн ХНХ-ын сайд Н.Ариунзаяа манай улсад ажиллаж буй гадаад ажилчдын талаар мэдээлэл өгөв. 2011 од манай улсын эдийн засгийн өсөлт 17 хувьд хүрэхэд нийт 30 мянган гадаад ажилчин байжээ. Харин одоо 5000 ажилтан байгаа аж. Гадаад ажилчдыг авчрах журамд өөрчлөлт оруулан, гуравдугаар сарын 1-нээс мөрдөж эхэлжээ. Гадаад ажилчдын тоонд хязгаарлалт тавихгүй, төлбөрийг 50 хувийг хөнгөлсөн журам баталсан байна.
“Заг” группийн Ерөнхий захирал Б.Нэмэхбаатар:
-Барилгын компаниудад тусгай зөвшөөрөл олгох үйл явцыг 100 хувь цахимжуулсан. Энэ ажлыг өмнө нь төрийн 14 албан хаагч гүйцэтгэдэг байсан бол одоо төрийн зарим чиг үүргийг холбоодод шилжүүлсэн. Б.Мөнхбаатар сайд энэ ажлыг их дэмжсэн.
Өмнө нь долоо хоногт цөөн тусгай зөвшөөрөл олгодог байсан бол тоо нь өслөө. Хамгийн гол нь дунджаар 10 сая төгрөгийн хахууль өгдөг байсныг бүр мөсөн халсан. Цахим системийг хоёр л хүн ажиллуулж байна.
Гэвч одоо авлига төрийн худалдан авалтад байсаар байна. Эрдэнэт, ЭТТ ковидын хуулийг түрүү барин, хаалттай гэрээ хийдэг. Эдгээр компанийн хийсэн гэрээг олон нийт хянаж чадахгүй байна.
“Түмэн ойл инвест” компанийн төлөөлөл: “Шинэ сэргэлтийн бодлого”-ын хүрээнд уул уурхайн тусгай зөвшөөрөлтэй компаниуд Алтан гэрэгэ хүлээж аваарай гэж Засгийн газраас зарласан. Мөн эдгээр компаниудыг нэмүү өртөг шингэсэн бүтээгдэх үйлдвэрлэж экспортод гаргаач гэсэн. Манай компани Дорноговь аймгийн Мандах суманд уул уурхайн чиглэлээр үйл ажиллагаа явуулах гэж байгаа. Гэтэл манай компанийн үйл ажиллагаатай холбоотой сөрөг мэдээлэл сошиалд цацагдаж эхэлсэн. Та бүхэн мэдэж байгаа байх.
Багийн 50-60 иргэн уул уурхайн үйл ажиллагааг эсэргүүцсэн. Бид төсөл хөтөлбөр, орон нутагт хийгдэх ажлуудаа ил тод танилцуулж байна.
Засгийн газрын хэрэгжүүлж буй “Шинэ сэргэлтийн бодлого”, Алтан гэрэгэ төрийн хамгийн бага нэгжид хэрэгжихгүй байна. Багийн хэдхэн иргэний жижиг ашиг сонирхлын улмаас Засгийн газраас хэрэгжүүлж байгаа бодлого унаж байгааг шийдэж өгөөч. Энэ асуудал ганц манайд биш, өөр компаниудад ч тохиолдсоор байна гэв.
