ОХУ-ын тамирчин К.Валиевагийн өнгөрсөн арванхоёрдугаар сарын сорьцоос илэрсэн “Триметазидин” хэмээх эм өвөөгийнх нь хэрэглэдэг эм байсан бөгөөд, санамсахгүй уусан хэмээн өмгөөлөгчид нь хэлсэн гэдгийг Олон улсын олимпын хороо мэдэгджээ.
ОУОХ-ын өдөр бүр хийж буй хэвлэлийн хурлын үеэр К.Валиеваг эмэгтэйчүүдийн ганцаарчилсан төрөлд оролцуулах шийдвэр юунд үндэслэж гарсан тухай сэтгүүлчийн асуултад ОУОХ-ны гишүүн Денис Освалд “Би тэр сонсголд байгаагүй. Гэхдээ өвөөгийнх нь хэрэглэдэг эм байсан гэж мэдүүлсэн тухай сонссон” гэжээ.
Түүний өвөө нь зүрхний өвчтэй бөгөөд дээрх эмийг хэрэглэдэг нь үнэн хэмээн ОХУ-ын “Dossier Center” цахим хуудаст бичжээ. Уг цахимт хуудаст мөн “Жишээ нь, өвөө нь эмээ уухдаа усаар даруулж, тэр аягыг нь К.Валиева дараа нь угаалгүйгээр хэрэглэсэн байж болно” гэсэн тухай “USA Today” мэдээлжээ.
“Бээжин-2022” олимпын наадмын уран гулгалтын багийн төрөлд алтан медаль хүртсэн К.Валиеваг Спортын арбитрын шүүхээс ганцаарчилсан төрөлд оролцуулах шийдвэр гаргасан боловч сэргээш хэрэглэсэн эсэх асуудал үргэлжилж буй хэвээр юм. Мөн, хэрэв тамирчин медаль хүртвэл шагнал гардуулах ёслол болохгүй, хэрэг нэг мөр шийдвэрлэгдсний дараа зохион байгуулахаар шийдвэр гарсан.
