Тусгай үүргийн онгоцонд төрсөн ихэр охидод өнөөдөр насан туршдаа МИАТ-аар үнэгүй үйлчлүүлэх эрхийн бичгийг гардуулах ёслол боллоо.
Истанбул-Улаанбаатар чиглэлийн тусгай үүргийн нислэгээр 2020-07-09-нд ирсэн онгоцонд нэгэн эх амаржиж, хоёр ихэр охин төрүүлсэн тухай мэдээллийг бид хүргэсэн. Нислэгт Буянт-Ухаа хилийн мэргэжлийн эрүүл ахуй халдвар хамгааллын 2 мэргэжлийн эмч, ХӨСҮТ-н бас нэг эмч хамт нисч явсан нь тун азтай тохиолдол болсон аж.
Тэд эх хүүхдийг эсэн мэнд амаржуулж, анхны тусламж үзүүлсэн байна. МИАТ-н удирдлагууд онгоцонд төрсөн ихэр охидыг хүндэтгэн хүлээн авсан бөгөөд энэ баяртай мөчийг хуваалцахаар охидын эцэг эх, төрөл төрөгсөд цуглажээ.
Хамгийн сонирхолтой нь ихэр охид ‘Та хаана төрсөн бэ?’ гэдэг амьдралд нь байнга тохиолдох асуултад ‘Онгоцонд’ гэж хариулдаг болох нь ээ.
Охины ээж сэтгэл хөдлөн баярын нулимс унагаж харагдсан бөгөөд ихэр охиддоо Энхцэлмэг, Энхжигүүр хэмээн нэр хайрлажээ.
