ШӨХТГ-ын даргын албан тушаал дээр нөхөн томилгоо хийгдэхээр болж буй юм. ШӨХТГ нь Монгол Улсын Шадар сайдын харьяа агентлаг бөгөөд Б.Бат-Эрдэнэ нь ковидын үеийн хуулиар сонгон шалгаруулалтгүй томилогдсон албан тушаалтнуудын нэг байв.
Тэрбээр ТАЗ-өөс чөлөөлөхөөр мэдэгдсэн дарга нарын жагсаалтад багтаж байсан ч сайдаар дэвшин ажиллахаар болоод байгаа юм. Түүний орон хийгдэх нөхөн томилгоон дээр Төрийн албаны зөвлөл сонгон шалгаруулалт зарлах эсэх нь одоогоор тодорхойгүй байна.
Засгийн газраас саяхан ТАЗ-өөс барьж буй энэ чиглэлийг эс тоож, хэд хэдэн томилгоог хийсэн. Уг жишгээр ШӨХТГ-ын даргын томилгоог сонгон шалгаруулалт зарлахгүйгээр хийх чигтэй байгаа юм. МАН-ын удирдлагуудын төвшинд Б.Бат-Эрдэнийн оронд “шилэн” Б.Цогтгэрэлийг томилохоор тохиролцсон гэх мэдээлэл байна.
Б.Цогтгэрэл нь 2020 оны УИХ-ын сонгуульд Сэлэнгэ аймагт нэр дэвшихээр бэлтгэж байсан ч У.Хүрэлсүх мандат өгөхөөс татгалзсан. Улмаар сонгуулийн дараа ШӨХТГ-ын даргаар очих шахалт намынхандаа хийсэн ч амжилтгүй болж,”УБТЗ” ХНН-ийн ажлаас мөн шахагдсан байдаг. Тэрбээр нэгэн үес УИХ-ын дарга Г.Занданшатарын зөвлөх хийж байгаад чөлөөлөгдсөн юм.
Замын-Үүд боомтоор 7 хоногийн хугацаанд 400-д чингэлэг ачаа барааг татан аваад байна
Монгол Улсын Шадар сайд ахлан ажиллаж байгаа Цар тахлын үед хилийн боомтын үйл ажиллалгааг сайжруулах, ачаа бараа хилээр оруулах асуудлыг нэмэгдүүлэх ажлын хэсэг цахимаар хуралдав.
Хуралдааны эхэнд Замын-Үүд боомтоор нэвтэрч буй чингэлэгтэй экспорт, импортын ачаа тээврийн үйл ажиллагааны явцын талаарх мэдээллийг Дэд ажлын хэсгийн ахлагч Зам тээврийн хөгжлийн дэд сайд Ж.Бат-Эрдэнэ танилцууллаа.
Хилийн дундын “ТЭГ” цэгээс чингэлэгтэй ачааг татан авч, Замын-Үүд дэх “Бүс нутгийн ложистикийн төв”-ийн талбайд буулгаж байгаа ажил хэвийн үргэлжилж байна. Өнөөдрийн хилээр орж ирсэн 68 чингэлэгтэй ачаа бараанд сэлбэг хэрэгсэл, гэр ахуйн, химийн бараа бүтээгдэхүүнүүд багтсан байна. Ачаа бараа татан авч эхэлсэн өдрөөс хойш 7 хоногийн хугацаанд нийтдээ 369 чингэлэг ачаа барааг татан аваад байна. Замын-Үүдийн хяналтын постуудад одоогоор гарсан зөрчилгүй, хэвийн байгааг дэд ажлын хэсгийн ахлагч мэдээллээ.
Цаашид импортын чингэлгийн тоог нэмэгдүүлэх чиглэлээр Хятадын талтай харилцан яриа хэлэлцээ явуулж байгаа гэлээ.
Шадар сайд С.Амарсайхан: “Зам тээврийн хөгжлийн яам, ХХЕГ, Гаалийн ерөнхий газар, Гадаад харилцааны яам зэрэг холбогдох байгууллагууд ачаа бараа тээвэрлэлтийн үнийг тогтвортой барих, нутгийн гүн рүү ачигдаж буй чингэлэг болон бараа бүтээгдэхүүний тээврийн зардлын үнэ өртгийг цаашид бууруулах чиглэлд анхаарч ажиллах хэрэгтэй. Мөн Гадаад харилцааны яам, Эрээний консул нар өргөн царигийн асуудлыг ойрын хугацаанд шийдвэрлэх тал дээр БНХАУ-ын холбогдох байгууллагатай яриа хэлэлцээрийг үргэлжлүүлэн ажиллах шаардлагатай” гэдгийг онцоллоо.
Цахим хурлын төгсгөлд Шадар сайд, С.Амарсайхан Замын Үүдээс бусад хилийн боомтуудаар тээвэрлэгдэх ачаа бараа эргэлтийн хүчин чадлыг нэмэгдүүлэхийн тулд тухайн хилийн боомттой хил залгаа Хятад улсын хилийн боомтын засаг захиргааны удирдлагуудтай холбогдож ажиллах Дэд ажлын хэсэг байгуулахыг үүрэг болголоо.
