Өнөөдөр /2022.01.18/ Тэтгэвэр, тэтгэмж нэмэх болон төсөвт тодотгол хийх эсэх асуудлаар Сангийн сайд Б.Жавхлан мэдээлэл хийлээ.
Тэрбээр “2022 оны төсвийн гүйцэтгэл, эдийн засаг зэрэг зүйлүүдэд том сорилт дагуулсан жил болохоор байна. Өнгөрсөн оны эцсээр батлагдсан шинэ сэргэлтийн бодлого бол дунд, урт хугацааны томоохон зорилт тавьсан эдийн засгийн цогц бодлогын арга хэмжээ юм. Ойрын хугацаанд С о v id-19-ийн үеийн хямаралаас гарах нь дэлхийн улс орнуудын хувьд тулгамдсан зорилго болоод байна. Тэр ч утгаараа Covid-19 бол нэг улсын инфляци гэж байдаггүйг харуулж байна. Өөрөөр хэлбэл, дэлхий нийтийн инфляци л гэж байгааг харуулж байгаа юм. Гаднаас бараа авахад, импортлоход ч инфляци яригдаж байна. Энэ үед эдийн засгаа хумьж биш, тэлж байж хүндрэлийг даван туулах бодлоготой ажиллана.
Шинэ хууль, нэмэлт өөрчлөлт болоод хуулийн төслүүдийн шинэчилсэн найруулгуудыг өргөн барина. Төр, хувийн хэвшлийн томоохон реформын шинжтэй хуулиуд зэрэг хуулийг өргөн барихаар төлөвлөж байна.
Төсвийн тодотголыг хуулийн хүрээнд тодорхой нөхцөл бүрдсэн тохиолдолд хийнэ. Харин тэтгэвэр, тэтгэмж нэмэх эсэх тухайд халамжийн бодлоготой уялдуулж явна. Өмнө нь жилд тэтгэврийг найм хүртэлх хувиар нэмдэг байсан. Сүүлийн хоёр жилийн хугацаанд тэтгэвэр гэхээс илүүтэй тэтгэмж, хүүхдийн мөнгө зэргийг 8-аас илүү хувиар нэмсэн. Тэгэхээр цаашид Цар тахлын хуулийн хугацаа дуусч, тэтгэмжүүдийн нэмэгдлийг хэвэнд нь оруулахаар тэтгэвэр нэмэх тухай яригдана. Тухайлбал, нийгмийн даатгалын бодлого дотор тэтгэврийн зөрүү арилгах асуудлыг төсвийн боломжийн түвшинд судлаад явна. Мөн инфляцитай уялдуулж тэтгэвэр нэмэх зайлшгүй шаардлага ч үүснэ. Тэгэхээр тухай бүрд нь төсвийн боломжид тохируулан судална” гэлээ.
Цагаан сар болон олон нийтийн арга хэмжээг хоёрдугаар сарыг дуустал цахим болгох асуудлыг шийдэж өгөхийг НОК УОК-оос хүслээ
УОК-ын орлогч дарга, хошууч генерал Г.Ариунбуян, нарийн бичгийн дарга, дэд хурандаа Т.Баярхүү нар өнөөдөр Нийслэлийн Онцгой Комисс /НОК/-ын Шуурхай штабт ажиллалаа.
НОК-ын Шуурхай штабын дарга Р.Дагва нийслэл дэх kopoнавиpycт халдварын нөхцөл байдлын талаар мэдээлэл өгсөн юм. Тэрбээр хэлэхдээ “ НОК нь kopoнавиpycт халдварын хариу арга хэмжээг нийслэлийн хэмжээнд зохион байгуулахдаа нийтэд чиглэсэн хариу арга хэмжээ, тандалт-тусламж үйлчилгээ, дархлаажуулалт гэсэн гурван чиглэлийг баримтлан ажиллаж байна. Тандалтын чиглэлээр хийсэн ажлыг товчхон танилцуулахад нийслэлийн хэмжээнд kopoнaвиpycт халдвартай зэрэгцэн хүүхдүүдийн дунд томуу, томуу төст өвчний идэвхжил нэмэгдэн, эмнэлгийн ачаалал ихсэж, хүндрэх эрсдэлтэй байна.
Түүнчлэн төвийн зургаан дүүргийн эрүүл мэндийн байгууллагуудын үйл ажиллагаанд хийсэн хяналтаар улаан бүсийн эмнэлгийн ажилчдын 21 хувь нь халдвар авснаас үүдэлтэй эмч, эмнэлгийн ажилчид дутагдалтай байна. Нийслэлийн хэмжээнд тандалтын баг 24 цагаар, Өрхийн эрүүл мэндийн төв /ӨЭМТ/-үүд уртасгасан цагаар ажиллаж байна. Тандалтын багт халдварын оргил үед 91 тээврийн хэрэгслийг дайчлан ажиллуулж байсан бол одоо 20 тээврийн хэрэгсэл ажиллаж байна. ӨЭМТ-д сайн дурын 10 жолооч, тээврийн хэрэгслийг нэмэлтээр ажиллуулж байна. ЭМЯ-ны дэргэдэх эрдэмтдийн багийн зөвлөгөөг чиг болгон баримталж, иргэдэд чиглэсэн тандалт болоод эмчилгээ үйлчилгээг цаашид ч үзүүлэхээр шамдан ажиллана” гэсэн юм.
Цаашид kopoнaвиpycт халдвар тэр дундаа омикрон хувилбарын тархалт буурахгүй бол хамгийн их эрсдэл хүлээх газар бол нийслэл. Тиймээс Цагаан сарын баярыг цахимаар тэмдэглэх, хурал, цуглаан, цайллага, сургалт зэрэг олон нийтийн арга хэмжээг хоёрдугаар сарыг дуустал цахимаар зохион байгуулах, Худалдаа, үйлчилгээний байгууллагууд нэмэлт тунд хамрагдсан иргэдэд үйлчлэх, дархлаажуулалтын түр цэгийн тоог нэмэгдүүлэх зэрэг арга хэмжээг УОК-ын хэмжээнд хэлэлцэн шийдвэрлэж өгөхийг хүслээ.
Нийслэлийн Эрүүл мэндийн газрын дарга Б.Бямбадорж “Kopoнaвиpycт халдварын тохиолдлын тоо 2022 оны нэгдүгээр сарын 3-ны өдрөөс огцом нэмэгдсэн. Нэгдүгээр сарын 1-3 дахь долоо хоногт хоногийн дундаж тохиолдол 3180-д хүрээд байна. Энэ нь өмнөх долоо хоногоос 34.9 хувиар өссөн /жирэмсэн 39.1 хувиар өссөн, хүүхдийн тохиолдлын тархалт өмнөх долоо хоногоос 39.8 хувиар өссөн/ үзүүлэлт юм. Гэрээр болон эмнэлэгт хэвтэн эмчлүүлэгчдийн тоо нэгдүгээр сарын 6-ны өдрөөс мөн нэмэгдэж, өнөөдрийн байдлаар 23642 хүн гэрээр эмчлүүлж байгаа юм. Энэ удаагийн халдварын онцлог нь нийт иргэдийн дунд халдварын тохиолдол огцом нэмэгдсэнээс эрсдэлт бүлгийн хүн амд хүндрэл учрах магадлал өндөр байна” гэлээ.
Уулзалтын төгсгөлд УОК-ын Нэгдсэн шуурхай штабын орлогч дарга Г.Ариунбуян НОК-ын Шуурхай штабын үйл ажиллагаа жигдэрч, омикрон хувилбарын тандалт, хариу арга хэмжээг зөв хувилбар, оновчтой арга хэрэгслүүдээр шуурхай авч ажиллаж байгааг дурдаад нийгэмд чиглэсэн, ард иргэдэд хандсан олон чухал ажлыг шуурхай зохион байгуулахад дэмжлэг үзүүлэхээ илэрхийллээ.
