Энэ өдрүүдэд УИХ-ын чуулганы нэгдсэн хуралдаанаар 2022 оны улсын нэгдсэн төсвийг хэлэлцэж байна. Төсвийг хэлэлцэж байх үед УИХ-ын гишүүн Д.Өнөрболор өөрийн сонгогдсон тойрог Сэлэнгэ аймгийн Алтанбулаг сумыг “Улсын жишиг сум” болгох төсвийг улсын төсвөөс хасуулах саналыг гаргаж улмаар байнгын хорооны гишүүдээр дэмжүүлжээ.
Монгол Улсын хойд хилийн онцгой бүс болох Алтанбулаг сумын удирдлагууд сумаа “Жишиг сум” хөтөлбөрт хамруулах хүсэлтээ Ерөнхий сайдад уламжилсан байдаг. Улмаар уг хүсэлтийг Ерөнхий сайд дэмжиж энэ дагуу УИХ-ын гишүүн Ч.Ундрам, Ж.Эрдэнэбат нар 2022 оны улсын төсөвт 4 тэрбум төгрөг суулгаж жишиг сум болгох ажил ирэх онд эхлэхээр болоод байжээ.
Гэтэл УИХ-ын Үйлдвэржилтийн байнгын хорооны хуралдаан дээр Сэлэнгээс сонгогдсон Д.Өнөрболор гишүүн Алтанбулаг сумыг “Жишиг сум” болгох ажлыг төсвөөс хасуулж, оронд нь Сайхан сумын барилгын фасадыг засварлах төсөл болгон өөрчлүүлжээ.
Д.Өнөрболор нь өөрийн гэсэн томоохон барилгын компанитай. Тиймээс иргэд олон нийтийн зүгээс бүхэл бүтэн сумыг улсын жишиг болгох ажлыг унагааж оронд нь өөрийн компанидаа 4 тэрбум төгрөгийг хуваарилж аваад мөнгө угаах нь хэмээн хардаж байгаа сурагтай. Хэрэв энэ үнэн бол ядарсан иргэдийн татвараар хувийн компаниа тэжээх байж боломгүй үйлдлийг гаргаж буй эрхэм гишүүнийг эргүүлэн татах үндэслэл болох талтай.
Алтанбулаг бол Монгол Улсын хойд хил, Монгол улсын нүүр царай болсон үүд хаалга, Ази-Европыг холбосон замтай, Монгол улсын эдийн засагт нэн чухал газар тул жишиг сум, хот болгон хөгжүүлэх нь улсын хөгжилд нэн чухал гэдгийг тус сумын ИТХ-ын төлөөлөгчид хэлж байна.
Л.Оюун-Эрдэнэ: Жуулчдыг татахын тулд вакцин үнэгүй хийх ёстой
Засгийн газрын өнөөдрийн хуралдааны үеэр Ерөнхий сайд Л.Оюун-Эрдэнэ агаарын хил тогтворжвол гадаадад вакцин хийлгэж амжаагүй монгол иргэд болон жуулчид Монгол Улсад вакцин хийлгэж болох уриалга гаргахыг БОАЖ-ын сайдад даалгажээ.
Тодруулбал, “Н.Уртнасан сайд жуулчдын компанитай ярьж, манай улсын агаарын хил тогтмол нээгдээд явбал гадаадад байгаа монголчууд болон жуулчид вакцингүй орж ирээд Монголд вакцинаа хийлгэж болно гэдэг уриалгыг гаргаж болно.
Төлбөртэй биш бөгөөд Монголд ирж жуулчлал хийсний төлөө вакциныг нь үнэгүй хийнэ. Нэг үгээр хэлбэл жуулчдыг татах сэдэл гэсэн үг” хэмээн онцлов. Түүний энэхүү уриалгад иргэд ихэд шүүмжлэлтэй байна. Салбарын сайдаа доош нь хийгээд байгаа юм уу, хийх ажлыг нь зааж өгөөд эсхүл юу юугүй хил гааль нээгдээд жуулчид орж ирэх гээд байгаа юм уу, иргэдээ вакцинжуулж барахгүй байж юун жуулчин, хэлэхч үг олдохгүй байна ийм зүйл яриад сууж байдаг Ерөнхий сайдтай байх ч гэж дээ гэх зэргээр иргэд бухимдлаа илэрхийлсээр байна.
