УИX-д дaхин нэг поп гишүүн бий болсон бололтой. Тэр нь шинэ гишүүдийн нэг Г.Дамдинням. Тэрбээр сонгуулийн дараа Төрийн ордонд гишүүний түр үнэмлэхээ гардан авсны дараа “Хамгийн түрүүнд Дарханы замыг засахад анхаарч ажиллана” хэмээж байв. Мөн УИХ-ын анхдугаар чуулганаар Засгийн газрын сайд нарыг танилцуулах үеэр Зам тээврийн хөгжлийн сайд Л.Халтарт хандан “Ерөнхий сайдын бүрдүүлсэн Засгийн газрын бүрэлдэхүүнд сэтгэл хангалуун байна. 
Зам, тээврийн сайд аа, Дархан, Сэлэнгэ, Орхон, Төв аймгийн нутгаар дайрч байгаа Монгол орны хамгийн гол транзит зам бол Дарханы зам. Энэ замын асуудал таны чихнээс салахгүй шүү. Энэ ажлыг дуусгуулахын тулд өрөөнд чинь очоод суучихна шүү. 
УИХ, олон нийтэд хэрэгжих боломжтой, үнэн зөв, тодорхой хугацаатай төлөвлөгөө танилцуулаарай. Дарханы замыг хэзээ дуусгах вэ, хэдэн оны хэдэн сард, ямар хэмжээтэй байхыг нь хэлэхгүй бол тодорхойгүй хугацаа хэлэхээр ард түмэн ойлгохгүй байна. Мэдээж энэ том төсөл. Хугацаа шаардагдана. Хугацааг нь үнэн зөвөөр олон нийтэд мэдэгдээрэй.” хэмээж байв.
Мэдээж тухайн үед нь дээрх зам засварын ажил эхлээгүй байсан. Харин түүнээс хойш туслан гүйцэтгэгч аж ахуйн нэгжүүд ажилдаа орж, шинэчлэлийн ажил урагшилж байгаа. Тэгсэн мань Дарханы замыг нэхэмжлэгч гишүүн маань сэвэх ганц сэдэв нь жамаараа “урагшилж” байгаад сэтгэл нь амарсан уу гэлтэй зугаалж яваа ажээ. Тэрбээр энэ тухайгаа өөрийн цахим хаягтаа “Анхдугаар чуулган завсарласны дараагаас тасралтгүй ажиллаж байгаа. Өнөөдөр ажлын цаг дууссаны дараа билэгдэл бодож ийм арга хэмжээнд оролцлоо. Дашрамд FB-н Гонгорын Дамдинням гэсэн хаягийг дагачуул замын талаар хийж байгаа ажлын бүрэн мэдээлэлтэй болно гэж зөвлөх байна.” хэмээжээ. Аргагүй л шинэ гишүүн одоохондоо хийсэн ажил нь үзэгдэж, харагдахгүй учраас тайлагнах зүйлгүй зугаатай байгаа бололтой.
