Хан хэнтий нутагт мэндэлж, хаадын өлгий нутгаас өдөлсөн шувууд үргэлж өндөрт нисдэг билээ. Оргил өөд тэмүүлэх тэдний нэгэн шонхорыг би Ш.Бямбацогт хэмээн сэтгэнэм. Агаарын цэнхэр долгионоор ард түмэнтэйгээ учран золгодог, айл бүхний хойморт эх орныхоо мэдээгээр саатан морилдог, авъяас билгийн
тэнгэр болсон нэвтрүүлэгчдийн нэг бол тэр.
“Монголын радио ярьж байна” хэмээх танил дотно хоолой. Авъяас билэг. Алтан үеийнхнээс өвлөсөн жинхэнэ нэвтрүүлэгчийн ур хийгээд хоолойн чадал чансаа, өнөөдрийг бүтээсэн нөр их хөдөлмөр нь түүнийг өнөөгийн Монголын Үндэсний телевиз, Монголын мэдээсувгийн нүүр царай, Монголын радиогийн дуу хоолой болгожээ. Нэгэн оны өмнө ийнхүү Монгол Улсын Соёлын гавъяат зүтгэлтэн хэмээх өндөр дээд шагналаар энгэрээ мялаалгасан тэрбээр өнөө зун нутгийнхаа 95 жилийн их ойн баяр наадмыг хөтлөхөөр уригдан ирсэн юм. Энэ үед түүнтэй уулзаж хөөрөлдөх ховорхон завшаан тохиосныг уншигч та бүхнийхээ гэгээн мэлмийд толилуулж байна.
-Сайн байна уу. Сайхан наадаж байна уу?
-Сайхан наадаж байна. Та бүхэн минь сайхан наадаж байна уу? Хэнтий нутгийн минь 95 жилийн их ойн баяр наадам өргөн дэлгэр сайхан болж байна. Юуны өмнө нутгийн зон олондоо Хан Хэнтий уулын аймаг байгуулагдсаны 95 жилийн ойн баяр наадмын халуун мэндийг дэвшүүлье.
-Та Хэнтий аймгийнхаа 90, 95 жилийн ойн баяр наадмыг хөтөлж байна. Сэтгэгдэл ямар байна. Нутагтаа ер нь хэр ирж очдог вэ?
-Өө өндөр өндөр. Маш сайхан байна. Ажлын байдлаас шалтгаалаад жилдээ нэг ирж чадахгүй байгаа. МУСГЗ хэмээх эрхэм цол хүртээд “Хан Хэнтийн салхи” номын нээлтийн үеэр анх удаа нутагтаа ирсэн. Аймгийн 90 жилийн ойг нэвтрүүлэгч Н.Баярмаагийн хамтаар хөтөлж байлаа. Мөн энэ удаад аймгийнхаа
түүхт 95 жилийн ойг Б.Гантигмаа найзтайгаа хамт ирж хөтөлж байна. Ер нь Монгол Улсын нийт үзэгчид сонсогчид дотроос намайг аль аймгийнх юм болоо гэдгийг ховор мэдэх байх аа.
– Хэнтий нутгаас радиогийн Бүдүүн дуут Б.Цэдэндамбаа, Өмнөдэлгэрийн н.Ганбат гээд тоочвол цөөнгүй нэвтрүүлэгч, сэтгүүлчдийн түүх сөхөх байх. Ямартаа ч таны хувьд радио телевизийн алтан үеийнхнийхээ “Алтан гинж”-ийг таслахгүй хэмээдгийг мэднэ. Жил гаруйн өмнө төр таны хөдөлмөрийг үнэллээ. Монгол
Улсын Соёлын Гавъяат Зүтгэлтэн гэх эрхэм цол хүртээлээ. Энэ тухайгаа дурсаач?
-2017 оны хоёрдугаар сарын 22-ны 17 цаг 28 минутад 26-гаар эхэлсэн дугаар залгадаг юм байна. “Сайн байна уу? Шагдаржавын Бямбацогт гуай юу. Монгол Улсын Ерөнхийлөгчийн тамгын газраас ярьж байна. Та МУСГЗ гэх эрхэм цол хүртжээ. Танд баяр хүргэе” л гэлээ. Юу юугүй л хоолой зангираад ирдэг юм
билээ. Утсаа салгачихаад бараг таван минут шахуу салфетиктай зууралдсан байх шүү (инээв). Өөрийн эрхгүй л нулимс урсаж байсан. Мэдээж баяр, догдлолынх байх нь дамжиггүй. Хэрэв арав гаруйхан жил ажилласан бол төрийн энэ том шагналыг авахгүй, авсан ч хийж бүтээсэн зүйл бага тул догдлохгүй байсан болов
уу. Би энэ их айлын босгыг алхаад одоо 27 жил болсон байна.
Тиймдээ ч миний хамт олон, найз нөхөд, инженер техникийн ажилчид, зураглаач, сэтгүүлч, редактор, үйлчилгээний ажилчид, үзэгч, сонсогч түмнийг минь л төр үнэллээ дээ гэж яалт ч үгүй догдолж баярласан.
Би өдий зэрэгтэй явж байна гэхээр бас муугүй хүн байх нь гэж дүгнээд байна л даа. Энэ бүхний үндэс суурь бол 50 жилийн түүхтэй Монголын Үндэсний олон нийтийн телевиз, 80 гаруй жилийн түүхтэй Монголын Үндэсний радиогийн үе үеийн уран бүтээлчдийн минь ёстой л чөмгөө дундартал ажилласан тэр он
жилүүдийн л шим юм даа. Тэр шим нь намайг өдий зэрэгтэй болгосон. Тэгэхээр төр үе үеийн бүхий л уран бүтээлчдийг хамтад нь шагналаа гэж ойлгож байна. Тиймээс хамт олондоо баярлаад, үзэгч түмэндээ мэхийгээд ханашгүй юм даа. Монгол төрийн дуу хоолой болсон нэвтрүүлэгчдийн алтан гинжийг
таслахгүйгээр үргэлжлүүлж мөн хойч үедээ ч үлдээх болно гэж хэлмээр байна.
