Засгийн газраас ко.ро.нави.руст халдварын энэ үед Үндэсний баяр наадмыг үзэгчгүй цахимаар хийх, харин аймаг, сумдын наадмыг бүрмөсөн хориглох шийдвэрийг гаргасан билээ. Үүнтэй холбоотой Үндэсний спортын холбоод болох Монголын үндэсний бөхийн холбоо, Монголын морин спорт, уяачдын холбоо, Монголын үндэсний харваачдын холбоод баяр наадмын талаар хамтарсан мэдэгдэл хийлээ. Тус мэдэгдэлд Монгол Улсын Засгийн газар, Улсын онцгой комиссоос Үндэсний их баяр наадмыг зөвхөн нийслэлд цахимаар зохион байгуулж, бусад аймаг сумдыг баяр наадмаа тэмдэглэхглүй байх шийдвэр нь монголчуудын талаас илүү хувь амьдран суугаа хөдөө орон нутагт таагүй уур амьсгал бий болгоод байна. Иймд үндэсний спортын холбоод баяр наадмаа улс, аймаг, сум бүрдээ нэгэн зэрэг хийх хүсэлтийг Монгол Улсын Засгийн газар Улсын Онцгой комистт хүргүүлж байгаагаа мэдэгдэж, мэдээлэл хийлээ.
-Монголын морин спорт, уяачдын холбооны ерөнхийлөгч Ц.Батсайхан: Өнөөдөр манай улсад нүүрлээд байгаа коронавируст халдварын өвчнийг хүн бүхэн мэдэж, ойлгож байгаа. Өнгөрсөн лхагва гаригт Засгийн газраас Үндэсний их баяр наадмаа цахимаар тэмдэглэж, аймаг сумдын наадмыг тэмдэглэхгүй байхаар шийдвэрлэсэн. Үүнд хөдөө орон нутгийн иргэд, уяачид, бөхчүүд, харваачид маш их бухимдаж, мэргэжлийн холбоод руугаа маш их хүсэлтийг илгээж байна. Тодруулбал, “Бид хөдөө орон нутагт вакцины хоёр дахь тундаа хамрагдаад 14 хоносон хүмүүс байгаа. Төр засаг цаг үеийн нөхцөл байдалдаа уялдуулан заавал долдугаар сарын 11,12-нд гэхгүйгээр долдугаар сардаа багтааж баяр наадмаа хийх талаар улахмжилж өгөөч ээ” хэмээн холбогдож байна.
Үүний дагуу гурван холбоод нэгдэн баяр наадмыг аймаг, сумд тэмдэглэхгүй гэдэг шийдвэрээ эргэн харах талаар Монгол Улсын Засгийн газарт мэдэгдэл хүргүүлж байна. Бид өнөөгийн халдварын нөхцөл байдлыг ойлгож байгаа. Энэхүү мэдэгдэл нь шаардаж эсвэл тушааж байгаа юм бол огт биш. Гэхдээ улсын наадам болоход 20 хоногийн хугацаа байна. Манай эрүүл мэндийн салбарынхан болон шинжлэх ухааны ажилтнууд зургадугаар сарын 15-аас хойш буюу иргэд хоёр тундаа хамрагдаад 14 хоносны дараа цар тахал буурна гэсэн хүлээлт байгаа. Тухайн цаг үед баяр наадмыг зохицуулаад шийдвэрээ эргэж харж өгнө үү гэсэн үүднээс байр сууриа илэрхийлж байна.
Монголын Үндэсний бөхийн холбооны тэргүүн Ц.Магалжав: Цар тахал олон хүнийг хамарч байгааг бид бүгд мэдэж байгаа. Гэхдээ энэ бол түр зуурын саад бэрхшээл байх. Засаг төр үүнд зөв шийдвэр, чиглэлийг гарган үндэсний гурван холбоодоос тавьж байгаа энэ хүсэлтийг бодолцон, зөв шийдвэрийг гаргаасай хэмээн хүсэж байна. Монгл Улсын 330 сум 21 аймагт давхардсан тоогоор 23000 орчим бөх барилддаг.
Ардын хувьсгалын 100 жилийн ойд барилдана гээд олон залуус бэлтгэл, сургуулилтаа хийгээд байж байна. Засгийн газарт баяр наадмыг том өв соёл гэдэг талаас нь харж, цар тахлын дэгдэлт өндөр байгаа энэ үед зөв зохион байгуулалтаар даван туулах буюу наадмын хугацааг тодорхой сунгах, хойшлуулах байдлаар бүх наадмыг нэгэн зэрэг төвлөрөл гаргахгүйгээр хийх боломж нөхцөлийг бүрдүүлж өгнө үү хэмээх санал хүргүүлж байна. Түүнээс биш зөвхөн Улаанбаатар хотын ойролцоо наадам хийж, үүнийг цахимаар дамжуулан хөдөө орон нутагт байгаа малчид, бөхчүүд, уяачдын эрх ашгийг хүлээн зөвшөөрөхгүй хаяна гэдэг байж болохгүй асуудал юм. Дараагийн 100 жилийн наадмыг бид бүгд мэдээж үзэхгүй. Иймд хөдөө орон нутагт болох наадмыг цар тахлын ид дэгдэлтийн үеэр хойшлуулж, халдварын тархалт намжсаны дараа хорио цээрийн дэглэмийг баримтлан зохион байгуулж өгөхийг хүсэж байна.
Монголын Үндэсний харваачдын холбооны Ерөнхий нарийн бичгийн дарга Б.Нямбаяр: Монгол Улсын 21 аймаг, 330 суманд өнгөрсөн жилийн хорио цээрийн нөхцөлд л гэхэд давхардаагүй тоогоор 5676 харваач харвасан. Энэ жилийн үндэсний сурын харвааг бид хүй долоон худаг дээр аль болох халдварын дэглэмийг барьж явуулъя гэсэн чиглэлтэй байсан юм. Гэвч Засгийн газраас гаргасан чиглэлээр үндсэндээ бүх ачаалал Улаанбаатар хот руу төвлөрөх эрсдэл үүсэх гэж байна. Энэ эрсдэлийг арилгахын тулд бүх аймаг сумдын наадмыг нэгэн зэрэг хийх эсвэл тодорхой хугацаанд хойшлуулна уу хэмээх хүсэлтийг бид УОК, Засгийн газарт тавьж байна” гэлээ.
