МАН-ын Хяналтын ерөнхий хороо 2020 оны нэгдүгээр сарын 29-ний өдөр хуралдаж, МАН-ын дүрмий зургаадугаар зүйлийн дагуу УИХ-ын гишүүн Н.Номтойбаярыг МАН-аас гарсанд тооцох шийдвэр гаргаж байсан билээ.
Улсын ерөнхий прокуророос гишүүн Н.Номтойбаярын бүрэн эрхийг түдгэлзүүлэх санал ирүүлснийг УИХ-ын Халдашгүй байдлын дэд хороо дэмжсэн ч УИХ-ын Хууль зүй болон Төрийн байгуулалтын байнгын хорооны гишүүд “Түдгэлзүүлэх шаардлагагүй” гэж үзэн, санал зөрчилдөж байх зуурт МАН-ын Ёс зүйн хороо хариуцлага тооцох нь зүйтэй гэсэн шийдвэрийг гаргасан. Үүндээ, “МАН-ын нэрээр улс төрийн өндөр албан тушаалд очсон гишүүн Н.Номтойбаяр олон нийтийн газар биеэ удаа дараа зохисгүй авч явсан, зодоон цохионд оролцож, намын нэр хүндэд сөргөөр нөлөөлж байгаа тул энэ асуудлыг хэлэлцэж, хариуцлага тооцох нь зүйтэй” хэмээсэн байдаг.
Энэхүү дүгнэлтийг МАН-ын Хяналтын ерөнхий хорооны 15 гишүүний 14 нь оролцон хэлэлцсэнээр намаас гарсанд тооцож байв. Ташрамд, МАН-аас хасах, гарсанд тооцох нь зарчмын ялгаатай ойлголт юм. Гарсанд тооцсон тохиолдолд намын гишүүн алдаа дутагдлаа ухааран эргээд хандвал нээлттэй байдаг. Энэ дагуу МАН-ын дарга У.Хүрэлсүх УИХ-ын гишүүн асан Н.Номтойбаярын намын гишүүнчлэлийг сэргээх талаараа түүнд дуулгажээ. Мөн НИТХ-ын дарга асан Ц.Сандуйн намын гишүүнчлэлийг нь сэргээхээр болсон байна. Түүнийг намын гишүүнчлэлээс гарсанд тооцох шийдвэрийг МАН-ын Хяналтын ерөнхий хороо 2019 оны хоёрдугаар сарын 19-нд гаргаж байв. НИТХ-ын дарга асан Ц.Сандуйг ’60 тэрбум’-ын хэрэгтэй холбогдуулан ийм шийдвэр гаргаж байлаа.
Ийнхүү УИХ-ын гишүүн асан Н.Номтойбаяр нэг жил хагас, Ц.Сандуйн хувьд хоёр жил хагасын дараа ийнхүү МАН-ын гишүүнчлэлээ сэргээн, эргээд албан ёсны хаягтай болж байна.
