Монгол Улс Л.Оюун-Эрдэнэ гэх залуухан Ерөнхий сайдтай болсноос хойш 127 хоножээ. Угтаа бол шинэ Засгийн газар төрийн бодлогыг тодорхойлоод төдий хугацааг өнгөрөөсөн байна. Энэ хугацаанд Л.Оюун-Эрдэнийн Засгийн газар хэрхэн ажилласан, ямар бодлого хэрэгжүүлсэн бэ гэдэг тайлангаа олон нийтэд нээлттэй танилцуулсан ч нийтээрээ түүнийг “Сайн байжээ, сайн ажиллалаа” гээд алга ташиж хүлээн авсангүй. Сэтгүүлчидтэй уулзалт хийж, Ерөнхий сайд тайлангаа танилцуулахад ч олонх нь Л.Оюун-Эрдэнээс ам асууж, бодлого шийдвэр нь “бай”-гаа онож байгаа эсэхийг нь эргэцүүлэх, эргэж харах шаардлагатай шийдвэрүүд ч бий гэдэг анхааруулга өгч байгаа харагдсан.
Эндээс Л.Оюун-Эрдэнийн Засгийн газрынхан сайн нэр дуулах нь битгий хэл улс төрийн хүрээнд ширүүхэн салхи гарахад л хийсээд унахаар хатуухан үгс мэр сэр сонсогдож байгаа харагдана лээ. Засгийн газрыг унах шалтгаан эрх мэдэлтнүүдэд мундахгүй. Өмнөх Засгийн газар гэхэд л эх хүүхэд хоёрыг өвлийн хүйтэнд углааш, халаадтай гаргасныхаа төлөөр танхимаараа огцорсон удаатай. Угтаа бол улс төрийнхөн хүсвэл ямар ч шалтаг шалтгаан гаргаад Засгаа унагаж, хүссэнээрээ өөрчилж болно гэдгийг харуулсан тод жишээ энэ болсон.
Сүүлийн хэдэн сар Засгийн газраас халамжид дулдуйдсан бодлого шийдвэр нэлээд гаргалаа. Үндсэндээ Засгаас гаргаж байгаа шийдвэр нь сонгууль угтсан намын даалгавар байсан гэхэд хол зөрөхгүй биз ээ. “Цар тахалтай тэмцэх хамгийн оновчтой арга зам бол иргэдээ вакцинжуулах” хэмээн Засгийн газраас энэ чиглэлд тодорхой хэд хэдэн арга хэмжээ авч амжив. Угтаа бол дархлаажуулалтын ажлыг нэн яаралтай явуулсан нь Ерөнхийлөгчийн сонгуулиар иргэдийн идэвхийг нэмэгдүүлэх, ирцийг хангуулах У.Хүрэлсүх даргад оноо авч өгөх бас нэгэн дэмжлэг байсан бололтой.
Хэдий вакцинжуулах арга хэмжээ эрчимтэй байгаа гэх судалгаа байгаа ч халдвар авсан иргэдийн тоо, нас баралт өдрөөс өдөрт нэмэгдсээр буй. Ийм эрсдэлтэй, хүнд нөхцөлд цар тахлыг хумих арга хэмжээ даруй авч, сонгуулийн үйл ажиллагааг хязгаарлах эрх мэдэл Л.Оюун-Эрдэнийн Засгийн газарт байгаа хэдий ч тэрбээр ямар ч шийдвэр гаргасангүй, гар хөл нь дөнгөтэй аятай байсаар өнөөдрийг хүрлээ.
Угтаа бол МАН-аас өгсөн чиглэл, У.Хүрэлсүх даргын даалгавар Л.Оюун-Эрдэнэ түүний тэргүүлсэн тахимын сайд нарыг оноо алдахад хүргэж байна. Тэд У.Хүрэлсүх даргыгаа олонд сурталчилж, сонгуулийн сурталчилгааг нь явуулах бүх боломжоор нь хангах үүрэг хүлээсэн. Тэд улс даяар ковид тархах эрсдэлийг хойш тавьж, улсын төсвийг улайтал нь үрэх тактикаар 100 жилийнхээ ойг угтаж, Ерөнхийлөгчид нэр дэвшигчээ дэмжиж байгаа юм.
Анх шинэ Засгийн газрыг байгуулахад л олны дунд энэ Засаг хэр удаан тогтох бол гэх эргэлзээ байсан. Харин сүүлийн өдрүүдэд “Засгийн газар огцорч, шинэ Засгийн газар бүрдэнэ” гэх цуу яриа МАН-ынхан дунд гэлтгүй Саарал ордноор дэгдэх болжээ. Тэр бүү хэл сайд нарын нэр ч дуулдаж, Засгийн газрын бүтцэд өөрчлөлт оруулах тухай цуурхал гарсан байна. Шинэ Ерөнхий сайдад УИХ-ын гишүүн асан Ж.Энхбаяр, МАН-ын генсек Д.Амарбаясгалан нарын нэр дуулдаж, У.Хүрэлсүхийн Засгийн газрын огцорсон сайд нар дахин ирэх бор шувуу нисэх болсон. Иймдээ ч тэд гомдолтой огцорсон ч өнөөдрийг хүртэл ганц үг ган хийлгүй нам жим сууцгааж байгаа гэнэ. Ингэхдээ МАХН-ынхан шинэ Засгийн газрын бүрэлдэхүүнд гурван сайд томилно гэх яриа ч олны дунд гарсан.
Энэ явган яриагаар бол Л.Оюун-Эрдэнийн тэргүүлсэн Засгийн газар хамгийн богино настай байж мэдэхээр байна. Ямар сайндаа л Л.Оюун-Эрдэнэ Засагтаа тэсэж үлдэхийн тулд аргаа барж, хотын даргатай хорших болжээ. Анх Ерөнхий сайдаар томилогдож, нийслэлийн Засаг даргын Тамгын газарт очихдоо хотын мээр Д.Сумъяабазарыг өөрийн биеэр тоссонгүй хэмээн уцаарлаж үүднээс нь буцсан сайд өнөөдөр түүнтэй үй зайгүй нөхөрлөж, бие биеэ түших болсон нь олны нүдэнд бэлэхнээ харагдаж буй. Үндсэндээ бол тэд У.Хүрэлсүх даргадаа гадуурхагдаж, ийн хорших болсон гэх явган яриа бий.
Л.Оюун-Эрдэнэ У.Хүрэлсүх нар сүүлийн үед түнжин муудаж, намын даргын суудлаа булаацалдах болсон гэх. Энэ талаар ч Л.Оюун-Эрдэнэ ам алдаж, сэтгүүлчидтэй уулзах үеэрээ “Үе үеийн Ерөнхий сайд нар намын даргын суудлаа авч, намын бодлого зангиддаг. Үүний дагуу би бүх шийдэгдэж байна” хэмээн гурван удаа давтаад амжсан. Угтаа бол Л.Оюун-Эрдэнэ намын даргын суудлаа авах сонирхолтой байгаагаа ийн илэрхийлсэн ч намын лидер, ахмад улс төрчид нь дургүй байгаа гэдэг. Иймдээ ч Ерөнхийлөгчийн сонгуулийн дараа шинэ Ерөнхий сайд томилогдож, шинээр хоёр яам байгуулах сураг дуулдаад байна. Тодруулбал, УИХ-ын ээлжит сонгуулийн дараагаас л яригдаж буй Цахим хөгжлийн яамыг шинээр байгуулах сураг бий. Ийн намрын чуулганаар Засгийн газарт дахиад өөрчлөлт орж, Л.Оюун-Эрдэнийн танхимын сайд нар төрхөмдөө буцах нь бололтой.
Эх сурвалж: ergelt.mn
