Тулгар төрийн 2230, Их Монгол Улс байгуулагдсаны 815, Ардын хувьсгалын 100 жилийн ойн Үндэсний их баяр наадмаа цаг үеийн нөхцөл байдалд тохируулан үзэгчтэй зохион байгуулна гэж Засгийн газраас мэдэгдсэн. Өнгөрсөн жил наадмын бөхийн барилдааныг үзэгчгүй зохион байгуулсан бол энэ жил 1024 бөх зодоглоно. Ингэхдээ 100 жилийн ойд зориулан улсын төсөвт 10 гаруй тэрбум төгрөг суулгажээ. Энэ нь 2020 оныхоос 7 тэрбум төгрөгөөр мөнгө зарцуулагдаж байна. Тухайлбал, Энэ жил
-Ардын хувьсгалын 100 жилийн тухай дуу бүтээхэд 100 сая төгрөг,
-Ардын хувьсгалын түүхэнд холбогдох хөшөө дурсгалуудыг сэргээхэд 250 сая төгрөг,
-Бүх ард түмний урлагийн наадам 500 сая төгрөг,
-Утга зохиолын шилдэг бүрээл туурвихад 100 сая төгрөг,
-‘Зуун жил- Зуун бүтээн байгуулалт’ тв контент бэлтгэн цувралаар хүргэхэд 100 сая төгрөг,
-Тайзны бүрэн хэмжээний ‘Монгол угсаатны билиг’ тоглолт туурвихад 270 сая төгрөг,
-‘Хаадын хаан’ жүжигт 200 сая төгрөг, ‘Эрхт Монгол’ концерт 80 сая, Шивээ хиагт дуурь шинэчилсэн хувилбар нь 50 сая төгрөг гэх мэтээр 10 тэрбум төгрөг зарцуулахаар төсөвлөжээ.
Энэ жилийн хувьд баяр наадмын нээлт, хаалтын концертыг Н.Наранбаатар, Г.Цоггэрэл, Б.Баатар нар хамтран найруулах нь ихээхэн онцлог болж байна.
Найруулагч Н.Наранбаатарын хувьд 2016, 2017, 2018 оны баяр наадмын нээлтийг гурван жил дараалан найруулсан. Г.Цоггэрэл 2019 оны наадмын ерөнхий найруулагчаар ажилласан. Харин Херо Б.Баатар 2020 оны үзэгчгүй наадмын концертыг анх удаа найруулж байв. Жилээс жилд төсөв нь данхайж, сэдэв нь ядуурсаар байгаа наадмын нээлтийг энэ жил дээрх гурван хүн Монголчуудын нүдийг нээнэ хэмээн ард иргэд асар их хүлээлттэй байгаа билээ.
Манай Улсын хувьд цар тахлын улмаас эдийн засаг элгээрээ хэвтсэн хүндхэн жилүүдийг туулж буй. 2021 оны төсвийг 2.1 их наяд төгрөгийн алдагдалтай баталсан. Үүнээс өмнө 2020 оны оны төсөвт тодотгол хийж, 4.8 их наяд төгрөгийн алдагдалтай төсөв баталсан гээд урд хормойгоо хойд хормойгоороо нөхсөөр өнөөдрийг хүргэж байна. Гэтэл эрх баригчид хоёр өдөр болох 100 жилийн ойн баяр наадмыг 10 тэрбум төгрөгөөр тэмдэглэж тансаглахнээ.
Эх сурвалж: News.mn
