Эв эе хагарч, нэгнээ элдэвлэж явсан түүхээ хойш нь тавьж байгаад сонгуулиар зэвүүн нэгдэж чаддаг нь МАН-ынхан онцлог. Эсрэг талд АН-ынхан энэ удаа жинхэнэ тархай бутархай байдалтай сонгуульд оролцож буй. М.Тулгат намынхнаа нэгдэж, Ерөнхийлөгчийн сонгуульд оролцохыг уриалсан нь хаданд хашгирсан цуурай болон үлдлээ.
С.ЭРДЭНЭ ХАР БОР БҮХ АЖЛАА ӨӨРӨӨ ГАРДАН ХИЙЖЭЭ
МАН-ын дарга У.Хүрэлсүх сурталчилгааны өмнөх орой бүлтэй хүн шиг загнаж, сонгуульд оролцох багуудтайгаа онлайн хурал хийн, сургаалиа айлдав. Харин С.Эрдэнэ сурталчилгааны өмнөх өдрүүдэд зардлын төсвүүдээ өөрөө нэг бүрчлэн хуваарилж, тарааж өгөх материалаа хүртэл хянаж, самбаруудаа цөөлөх даалгаврууд өгч суусан гэх. Тэр ингэж өөрөө бүхнийг гардаж хийсэн нь мөнгө санхүүгийн хүрэлцээ багатай нь холбон тайлбарлаж болох. Нөгөө талаар хувь хүний онцлогоороо нэг бүрчлэн асуудалдаа оролцож, баахан бухимдсан дүр зураг харагдана. Нэгэнт М.Тулгат, Ч.Өнөрбаяр нар хэт залуудаж, түүнд хань болохгүй байгаа тул С.Эрдэнэ одоо өөртөө л найдахаас өөр гарцгүй болжээ.
Хууччуулаас Э.Бат-Үүл, Д.Сосорбарам тэргүүтэй хүмүүс дэмжих сэтгэлтэй байгаа ч санхүүгийн хувьд туслах чадамжгүй. Нөгөө талд ҮБХ-ны гишүүдээ өөрсдийн зардлаар орон нутагт ажиллах чиглэлийг С.Эрдэнэ өгч буй ч санхүүгийн боломж тааруу гэсэн хариу сонссон байдалтай байгаа аж.
Ж.БАТСУУРЬ НАРЫН ГИШҮҮД АЙМАГТАА ШТАБ НЭЭХЭЭС ТАТГАЛЗЖЭЭ
С.Эрдэнийг нэр дэвших үнэмлэхээ авахад олон жил дагаж буй тул эрх биш С.Одонтуяа гишүүн очив. Үүн дээр хувь хүнийхээ хайлган цагаан байдал, намын бүлгийн дотоод уур амьсгалаа дагаж, Д.Ганбат очиж үзэгдлээ. Бусад УИХ-ын гишүүд нь очсонгүй. Энэ нь шууд утгаараа С.Эрдэнэ 11 гишүүнтэй УИХ дахь сөрөг хүчнээс дэмжлэг авахгүй гэдгийг харуулж өглөө.
Тухайлахад, Ж.Батсуурь, Н.Ганибал нарын гишүүд Сүхбаатар аймагт сонгуулийн штаб ч нээлгэхгүй гэх хатуу байр суурь илэрхийлсэн гэх мэдээлэл бий. Ерөнхийлөгч Х.Баттулгын хүмүүс олонтой Баянхонгор, Булган тэргүүтэй аймгийн намын хороод С.Эрдэнийг дэмжиж ажиллахгүй нь эхнээсээ тодорхой байсан. Энэ мэтээр ихэнх аймгууд дээр С.Эрдэнийг дэмжих намын аппарат ажиллахгүй чигтэй байгаа юм.
Түүнчлэн ухуулагчдын цалинг маш багаар тогтоосон тул орон нутгуудад ухуулагчгүй шахам ажиллах нөхцөл байдал үүссэн гэх. Энэ мэтээр АН ялсан, ялагдсан аймгууд ялгарах юмгүй шахам С.Эрдэнэд үйлчлэхгүй байх нөхцөл байдал үүсчээ.
З.ЭНХБОЛД, Х.БАТТУЛГА НАР НЭГДЭЖ, СОНГУУЛИЙН ДАРАА НАМАА АВНА
Эдүгээ АН-ынхан С.Эрдэнэд байгаа тамгыг хүчин төгөлдөр гэдгийг ерөнхийдөө хүлээн зөвшөөрчээ. Тиймээс ч сонгуулийн дараа Ерөнхийлөгч Х.Баттулгын тал хурдхан намаа авах агуулга дээр л төвлөрч буй. Тэдэнтэй З.Энхболд нэгдсэн нь ч санамсаргүй хэрэг биш. С.Эрдэнийн талаас сонгуулийн өмнө нэгдэж, хүчээ бөөгнүүлэх санал тавьсан нь Ерөнхийлөгчийн талаас татгалзсан байна.
Тэд аравдугаар сард гарч ирэх СХД, Хэнтий аймгийн нөхөн сонгуулийн тов, 2024 оны улстөрөө бодсон ч тэр АН-ын тамга байгаа газарт эрх мэдлийн тугаа хатгах нэн шаардлагатай. Тиймээс өөрсдийн нөлөөлөл өндөртэй аймгууд дахь намын үүрүүдэд С.Эрдэнийг дэмжин ажиллахгүй чиглэлийг ил далд өгсөөр байгаа гэх. Нөгөө талд С.Эрдэнэ хүлээн зөвшөөрөгдөхүйц дүр биш нь бүр ч нэрмээс болж буй аж.
СЭТГҮҮЛЧИЙН ТЭМДЭГЛЭЛ: Үнэндээ С.Эрдэнийн зүгээс У.Хүрэлсүх, Д.Энхбат нартай өрсөлдөхөөсөө илүүтэйгээр намынхаа дотоод уур амьсгалд сөхөрсөн байдалтай сурталчилгаагаа эхлүүлэв. Нөгөө талд зориуд МАН-тай тохирч, асар мөнгө халааслаад бэлгэдлийн дүрээр сонгуульд оролцож байгаа гэх таамаг ч түүнээс салахгүй. МАН-тай эс үгссэн байлаа ч С.Эрдэнэ намаасаа дэмжлэг хүлээгээгүй нь дүр нь үнэн.
Утгачилбал, С.Эрдэнийн нэг талд АН-ын дотоод дайснууд нөгөө талд У.Хүрэлсүх гэж хүчирхэг багтай тоглогч, өөрийнх нь саналыг сайтар хуваах Д.Энхбат нар хүрээлжээ. Ийм хайчин дунд сайн дураараа шахам ялагдаж, сонгуулийн дараа намынхаа даргыг өгөх хувь заяа л түүнийг хүлээж буй гэлтэй. Эл дүр зургийг харсаар, тооцсоор, мэдсээр байж, чухам яагаад сонгуульд оролцов гэдэг нь л ихээхэн хачирхалтай явдал. Намынхаа тамгыг атгаж байхад л уг нь С.Эрдэнэд өнөөгийн нөхцөлд хүч нь оршиж байсан билээ.
